Comunidad un bez mas den alerta cu huymento di preso:
ORANJESTAD (AAN)— Door di yamadanan a drenta Diadomingo na DIARIO, por nota cu un biaha mas e comunidad ta den panico, debi na huymento di otro preso, unda tin indicacion cu ta trata di un persona hopi peligroso.
Awo ta dos fugitivo tin! Miguel Schneiders a huy recien, y awor ta Gerson Martina.
Famianan a tuma contacto cu otro usando tur e formanan digital cu tin pa comunica, pa alerta por ehemplo mayornan cu ta biba nan so, of rumannan cu ta biba den un bario un tiki leu di otro, pa tene e portanan di entrada y patras na look, pa ta atento na cualkier ruido of movecion straño cu por tin, incluso pa tene cuenta cu blafmento sea di nan cacho of di cachi di un bisiña, cu por duna indicacion cu nan ta wak of sinti algo straño.
Pa nan no tin nan celular paga. Pa keda wak wsp si tin cualkier noticia nobo, pasobra via radio nan no a scucha nada, pues pa di un of otro manera nan ta cla pa cana dilanti, preventivamente, te unda por. Y pa preferiblemente no laga e muchanan bay hunga den mondi tanten cu e inseguridad aki no wordo resolvi.
Pero tambe tin hende cu ta pidi politiconan di gobierno y oposicion, incluyendo Parlamentarionan, pa no hinca e asunto aki “den un macuto politico”.
No cuminza cu tiramento di falta di un pa otro minister of signature politico cu a, of ta goberna. Pero mas bien pa nan uni experiencia, forza, idea, comparti sugerencia pa tur hunto yega na un plan estrategico pa e preveni e tipo di fuganan aki. Tur partido cu a goberna y cu ta gobernando awo (coalicion) mester por tin e hendenan capacita pa duna un man, y union ta haci forza. Ta momento pa laga color politico un banda y sali bringa contra criminalidad y pa seguridad di nos pais, bao un solo bandera: ARUBA. Tur hunto mester forma pensa riba pueblo di Aruba y ningun interes particular. Tiramento di falta ta haci e pais mas vulnerable, uni conocemento y experiencia ta fortifica nos pais. Asina leu, un compilacion di opinion publico!
