Director di DIP:
ORANJESTAD(AAN): Diabierna durante di un conferencia di prensa, director di DIP Haime Croes a reacciona riba cierto informacionnan cu a sali den prensa pa loke ta terenonan cu ilegalmente lo ta wordo bendi.
Croes a papia di un reportahe di prensa riba un señora di San Nicolas cu a reclama cu terenonan supuestamente ta wordo bendi y cu nada ta pasa.
E director a indica cu te hasta ta culpa DIP y e Minister encarga di ta forma parti di esaki.
“Mi kier ta hopi cla riba esaki”.
“For di tempo cu e minister aki a drenta gobernacion pa loke ta trata obranan publico, metanan cu nos a pone nos dilanti ta entre otro cu nos kier pa pueblo haya su fair share”.
“Cosnan cu ta patrimonio di pueblo ta keda di pueblo y tambe nos ta bay yuda tur esunnan a base di ‘first in first out’ pa haya un pida tereno”.
“E problema mas grandi cu nos tabata tin ultimo añanan pa loke ta obranan publico ta un retrazo y bendemento di tereno”.
“Nos mester ta hopi sincero, unda cu nos tur sa kico a pasa den ultimo añanan, unda cu terenonan tabata wordo bendi”.
Esaki segun Croes, kende a sigui bisa cu esaki a wordo soporta durante añanan door di cierto gobiernonan y tambe notarionan.
“Nos ta ataca e monster/cancer ey, door di un maneho transparente, unda cu nos a pone den e nota ‘Hunto pa Aruba’ cu nos tin cu caba cu speculacion di tereno”.
Esaki segun e director di DIP, kende a splica cu segun Nacionnan Uni tur hende tin derecho riba un dak riba nan cabez, pero esaki no kiermen automaticamente un tereno.
“Nos mester ta sincero cu no ta tur hende por traha un cas y pesey tin diferente tipo di maneho di vivienda”.
“Gobierno via FCCA ta purba yuda hendenan cu no por yega na un cas”.
“Pesey ta importante pa stipula cu nos tin un maneho cla y si hende cumpli cu tur e criterionan, nan ta yega na remarke pa e tereno y cas”.
Esaki segun Croes, kende a indica cu den e añanan cu a pasa varios hende a bende e terenonan pa nan por gana placa.
Awor DIP a bay cerca diferente notario pa splica nan cu esey no por mas.
“Door cu pa añanan largo a ‘doog’ locual tabata sosode, nos a duna nan un fase transitorio di 1 aña, cu a caba na Februari”.
“Gobierno awor tin e derecho di hala aden e terenonan Erfpacht, si bo no construi segun e maneho”, segun Croes.
“Pesey nos ta lamenta e caso di San Nicolas”.
“No ta Minister Oduber ni DIP, pues nos kier ta hopi cla”, segun e director.
