Home General Town Hall Meeting encuanto desigualdad di genero y intimidacion sexual na pia...

Town Hall Meeting encuanto desigualdad di genero y intimidacion sexual na pia di trabao

75
0
SHARE
- Advertisement -

AVP ta presenta

ORANJESTAD (AAN): E tema di igualdad di genero ta uno hopi actual internacionalmente y ta un di e metanan di Nacionan Uni pa cu e metanan global pa un desaroyo sostenibel pa cu 2030.

Na Aruba tambe mester continua cu esfuersonan haci den pasado pa trece e topico di igualdad di genero y reduccion di desigualdad mas den lus di dia. Aruba ta conta cu un forsa laboral di mas o menos 44.000 ciudadano y banda di esaki un populacion di 1.500 studiante cu gran parti di nan lo yega na experiencia di un of otro forma cu e tema di intimidacion sexual na pia di trabao of na scol.

E bienestar di e poblacion di cualkier pais mester keda riba agenda, den e caso aki tambe e bienestar psycho-social y emocional na pia di trabao y na scol. Na aña 2015 tabata tin un investigacion cualitativo y cuantitativo pa duna un impresion como base pa cu e topico di intimidacion sexual na trabao na Aruba. A sali afor cu 1 di cada 3 trahador femenino ta experiencia esaki na trabao, sea tur dia, tur siman of frecuentemente.

Desde 2013 a pasa e ley di labor den e Codigo Civil cu ta inclui cu un trahador lo por yega asina leu di denuncia y bay corte pa su superior of un colega di trabao pa intimidacion sexual na pia di trabao. Y mester remarca cu ta diferente caso tawatin cu a yega asina leu y accion a ser tuma contra e persona cu a ser demanda.

Pero ta importante pa remarca cu prome cu yega asina leu pa bay corte cu un colega of superior tur trahador y compania mester inclui y promove den nan maneho un persona di confianza of HR, tambe mester tin proceduranan pa entrega keho, mester tin analisis di risico pa e topico y tambe mester tin investigacion y sancionan den caso cu enberdad tin intimidacion ta tumando lugar. Sin e proceduranan aki y tambe concientisacion tocante e topico e lo continua di sosode y nos como comunidad lo sufri e consecuencianan.

Tambe departamentonan gubernamental encarga cu labor lo mester continua fuertemente riba e topico aki mirando cu e cifranan pa Aruba ta sumamente alarmante. Den un encuesta recientemente e percentahe di personanan incluyendo studiantenan a yega na 57% cu ta experiencia intimidacion sexual di un of otro forma, por ehempel fisico, non-verbal, via telefon of medionan social. E responsabilidad aki pa carga e topico mester ta uno colectivo, cuminsando di gobierno y su departamentonan, legisladornan pa wak unda mas lo falta ley, por ehempel den e ARBO- wet cu practicamente desde 2017 a ser laga den fasenan di concepto final.

Pero tambe den e sector priva y colectivo mester traha duro riba e topico mirando cu e ta algo cu ta sosode tur caminda. Tambe sindicatonan, gremionan, shop stewards y otro gruponan lo mester pone mas enfasis pa crea un clima profesional y caminda tur hende por sinti nan mes trankil y sigur cu nan por eherce y crece den nan trabao sin mester por worde stroba of perhudica pa motibo di nan genero.

Na Aruba sa tolera hopi pero na mes momento mester distingui por ehempel entre un ‘joke’ of un comentario cu no ta na su lugar. E bienestar di nos trahadornan y mas ainda e hende muhernan den comunidad mester keda halto riba agenda. E hende hombernan na Aruba mester ta un partner pa lucha schouder cu schouder pa asina e statisticanan cu Aruba ta enfrentando actualmente pasa pa pasado.

Pesey tur persona cu ta considera cu nan lo kier sa mas di e topico actual aki ta keda cordialmente invita pa diamars, 27 di Augustus di 6:30 pa 8:30 pm na Cas di Cultura pa asina haya mas informacion y duna nan aporte y contenido pa Aruba por sigui progresa, entrada ta gratis. E keynote speaker pa e anochi lo ta Sra Karin Bosman cu ta un experto internacional riba e tereno di intimidacion sexual na pia di trabao. Tambe sra Sandra Brown kende a traha hopi aña na bienestar di hende muher lo duna un discurso e anochi aki sigui pa un discusion di  panel.

- Advertisement -

DUNA COMENTARIO

Please enter your comment!
Please enter your name here