Home Gobierno Trahadornan di Hotel na San Nicolas ta dura 3 pa 5 ora...

Trahadornan di Hotel na San Nicolas ta dura 3 pa 5 ora tur dia pa yega nan trabao

1877
0
SHARE
- Advertisement -

ORANJESTAD (AAN): Den su discurso den e prome cumbre di negoshi organisa pa San Nicolas Business Association, Prome Minister Evelyn Wever-Croes a duna e vision di Gabinete Wever-Croes riba diferente tereno di desaroyo pa San Nicolas. Entre otro, Prome Minister a elabora riba e resultado di un studio relaciona cu Transporte Publico.

E estudio aki, bou peticion di e taskforce di San Nicolas, a worde haci pa un compania priva un aña pasa. E ta un estudio independiente cu a worde haci di e situacion di transporte publico cu ta sirbi e pueblo di San Nicolas. Prome Minister a comparti cu algun di e resultadonan, pa asina mustra con importante e ta pa nos crea desaroyo den San Nicolas y pa san Nicolas.

   (1) Trayecto/Duracion di biahe:

Aki e estudio a conclui cu diariamente, tin centenares di ciudadano cu ta biba na San Nicolas ta depende di servicionan di Arubus pa yega na nan luga di trabao.

E biahe aki ta tuma aproximadamente 3 pa 5 ora pa dia di San Nicolas, pa area economico hotelero di nos isla.

Dependiendo di unda e ciudadano ta biba den area di San Nicolas, mester tene cuenta tambe cu nan tempo di biahe adicional di cas pa bus halte. Mas leu un ciudadano ta biba di bus halte mas largo e trayectoria di biahe ta.

  (2) Costo di biahe:

Durante e estudio a tuma nota di un entrada di promedio di aproximadamente 1.800 Florin pa luna di e ciudadanonan cu ta biba na San Nicolas y ta uza transporte publico. Pa e pasaheronan aki cu ta depende continuamente di servicionan di bus/transporte publico esaki por nifica un costo entre 540 pa 680 Florin pa luna solamente na tarifa di transporte.

   (3) Poder di compra den propio ciudad:

A worde comproba cu mayoria di personanan cu ta uzando e servicionan di bus y “foot traffic” den Centro di San Nicolas, ta haci esaki entre 5:00 am pa 7:00 am y ta bolbe subi despues di 6:00 pm.

Mayoria di nan ta traha den dia den area di hotel. Esaki ta nifica cu e habitante cu poder di compra no tey den ciudad di San Nicolas durante orario di haci negoshi. Hopi ta opta pa haci nan compras pabou di brug, pasobra ta mas conviniente.

   (4) Supervision di muchanan pa un adulto:

Pa e ciudadano di San Nicolas cu ta depende di transporte publico, e oranan biahando ta pone cu e no por supervisa menornan di edad den su famia.

Den e investigacion a resulta cu mayoria di e hobennan bou di 16 aña tin supervision di adulto limita durante ausencia di mayor cu ta laborando, den e momentonan cu e hobennan ta bay of sali di school y tambe oranan di atardi te cu anochi.

   Loke kico e investigacion aki a mustra:

Door di e duracion di biahe largo, esaki ta afecta e calidad di bida di e ciudadano.

E ta afecta e supervision cu e mayor mester tin riba hobennan debi cu e mayor mester sali hopi trempan for di cas y yega back mas laat, pasobra e mester trece entrada den su hogar. E menor cu falta supervision adulto por ta exponi na situacionnan problematico y peligroso cu por contribui na problemanan social.

Tambe e costo di biahe pa esnan cu tin un entrada minimo, ta halto y no solamente ta reduci e capacidad di compra den San Nicolas sino tambe afecta e calidad di bida en general di henter un famia.

E investigacion a mustra tambe cu hustamente e personanan cu poder di compra, no tey den e area economico di San Nicolas durante oranan oficial di negoshi. Economia local ta cuminsa cu su localnan y esey mester worde adresa semper prome.

   Prome Ministro su vision:

Segun Premier Wever-Croes, nan mision primordial di Gabinete ta pa pone e ser humano central. E investigacion aki a mustra nos cu pa logra esaki nos mester restructura e sistema di transporte publico actual, nos mester atende e crisis social di nos pais, y principalmente nos mester crea oportunidad pa tur ciudadano den San Nicolas mes.

No ta un secreto cu nos gobierno a hereda un situacion financiero hopi delicado, y e retonan financiero tey ainda. Sinembargo nos a scoge pa lora manga y mesora a prepara un plan economico financiero, y nos a cuminsa atende cu e retonan. Nos ta riba e bon caminda, IMF y S&P a confirma esey.

Recientemente nos a cuminsa introduci un flota nobo di bus, y nos lo sigui busca formanan pa reduci duracion di biahe for di San Nicolas y pa San Nicolas.

Una bes nos logra esaki nos por sigui busca formanan pa yega na tarifanan husto pa e trahadonan.

“Nos ta kere firmemente, cu despues di un dia di trabao, mas trempan nos hendenan por yega cas, miho nan por cuida di nan famia y inverti den nan propio economia local.”

- Advertisement -

DUNA COMENTARIO

Please enter your comment!
Please enter your name here