Home Turismo Turismo den henter Caribe a conoce aumento den prome seis lunanan

Turismo den henter Caribe a conoce aumento den prome seis lunanan

42
0
SHARE
- Advertisement -

ORANJESTAD (AAN): Den e seis lunanan cu a pasa, turismo den Caribe a mantene un tendencia sosteni di aumento, cu a genera un actividad economico grandi pa e islanan, y cu segun Caribbean Tourism Organization (CTO), lo por sigui aumenta pa loke ta resta di e aña.

Recientemente CTO a revela cu entre Januari y Maart, e cantidad di pasaheronan cu a yega Caribe via avion a subi cu 12%, cu ta bira un di e aumentonan mas grandi desde varios aña.  Nan a registra 9.1 miyon viahe turistico internacional rumbo pa islanan di Caribe, cu ta 970.000 mas compara cu e mesun periodo di aña pasa.

Hasta e industria di crusero den Caribe a conoce un crecimento, cu un aumento di 9.9% den yegada di pasahero di crusero.  Esaki ta igual na 10.7 miyon yegada na e islanan.  Esaki ta e di tres aña consecutivo cu e cruseronan ta conoce un crecimento grandi pa e region aki.

Aunke e datonan di e di dos trimester di CTO no ta disponible ainda completamente, te cu luna di Mei, 20 di 22 pais Caribense cu a comparti dato, a mustra cu yegada internacional a conoce aun mas aumento.  E yegada di bishitantenan tambe a subi na 7 destino, cu a publica e numbernan pa periodo di Januari te cu April 2019.

Segun CTO, e turistanan di Merca ta sigui di ta e principal mercado turistico di Caribe.  Pa e prome trimester, como 4.5 miyon Mericano a bishita Caribe, mientras cu Canada ta na di dos lugar cu 1.5 miyon turista, loke a representa un aumento di 4%.

Den e caso di Puerto Rico, e isla a conoce un crecimento turistico di 62.3% pa e prome mitar di 2019.  CTO ta bisa cu e exito di Puerto Rico ta bin door di e reconstruccion di e isla despues cu Horcan Maria a pasa menos di dos aña pasa.  Banco Mundial ta calcula cu e crecimento ta lo ta 2.3% mehora door di reconstruccion.

   Demanda pa Caribe ta crece:

Di otro banda, Expedia Group a bisa cu Puerto Rico, hunto cu Aruba, Cuba, Republica Dominicana, Jamaica, y Bahamas ta e mercadonan cu tin mas demanda pa e di dos trimester di e aña aki.  E alohamento na e principal mercadonan di Caribe durante e periodo aki a subi cu 28%, y a bin principalmente di Merca, Canada, Reino Uni, Brasil, y Francia.

E compania a bisa tambe cu e uso den demanda pa uso di smartphones pa haci reservacion di viahe pa Caribe, a subi cu 40%.  Den otro palabra, 1 di cada 4 reservacion haci riba e plataformanan di Expedia Group (manera Hotels.com, Expedia.com, Trivago.com, Orbitz.com, Hotwire.com, CheapTickets.com, etc) a wordo haci via un smartphone mobile.

Tambe e benta di package pa destinonan di Caribe a crece cu 9%, y tambe 63% di turistanan internacional a opta pa keda den Hotel of propiedadnan cu ta cataloga bao “Four Stars”.  Mayoria di package ta wordo bendi na turistanan procedente di Merca, Canada, Brasil, Chile, y Spaña.

Den Caribe, e cantidad di dia cu turistanan ta keda ta di solamente 2 dia.  Mientras e otronan ta keda entre 3 pa 4 dia.  Pa tur destino den Caribe, e alohamento preferi pa e bishitantenan ta Hotelnan di 3-Strea of 4-Strea.

Den e prome tres luna di 2019, Cuba a ocupa prome lugar cu un crecimento di 153%.  Na di dos lugar tin Puerto Rico cu 80% di crecimento.

Pero den e siguiente tres lunanan, Cuba a ocupa prome lugar cu 46%, sigui pa Bahamas cu 39%, y Puerto Rico cu 30%.

E demanda pa uso di smartphones pa haci reservacion di viahe a subi cu casi 30%.

   Puerto Rico ta mihor den Airbnb:

Puerto Rico ta domina e lista di e diez principal destinonan mundial di Airbnb pa verano.  Segun Carlos Muñoz, director di Comunicacion den Caribe y Centro America, municipionan manera Dorado, Vieques, y Rio Grande a registra un aumento di mas di 400% den reserva, compara cu e aña anterior.

E compania di Airbnb ta calcula cu durante e lunanan di verano, e cambernan disponible na Puerto Rico lo bay acomoda mas di 64.000 turista.  E cifra aki ta bin di e turistanan cu ya caba a confirma nan reservacion, pero Airbnb ta spera cu e cifra aki lo bay subi aun mas.

- Advertisement -
SHARE
Previous articleMarcolino Dijkhoff
Next articleOvilmar Joseph

DUNA COMENTARIO

Please enter your comment!
Please enter your name here