Home General Un bofon historico di Aruba, necesidad di pueblo y nos leynan

Un bofon historico di Aruba, necesidad di pueblo y nos leynan

502
0
SHARE
- Advertisement -

Analisis

Na momento cu Corte di Apelacion na Delaware, Merca, a dicidi cu e compania minero Canades, Crystallex, por pone beslag riba Citgo,  e bofon di mas grandi cu Aruba a conoce den su historia, a yega na su culminacion.

For di momento cu Citgo a wordo introduci na Aruba, e gobierno di Mike Eman a uza e arma cu su opositornan ta contra e proyecto pa asina kibra tur ley cu tabata stroba pa nan alcansa nan meta.

Den un acto unico den nos historia politico, e gobierno Mike Eman a haci bofon di leynan basico di Aruba pa sin mandato, aprobacion, di Parlamento firma un acuerdo pa pone fin na Valero y introduci Citgo bou promesanan grandioso.

Kico tabata tin tras di e bofon aki? E prome bofon cu e gobierno di Mike Eman lo a deshaci di BBO pa asina pueblo di Aruba pueblo tin Aruba por tabata tin mas placa den su man pa gasta, a habri porta pa Mike Eman y su gobierno gasta mas na propaganda pa su persona.

Gobierno Mike Eman a haci bofon di un pueblo cu a duna e partido un mayoria absoluto den e speransa cu lo a bini mas bienestar pa Aruba.

Ora fondonan di pueblo a wordo mal uza pa entre otro proyectonan cu awe ta den man di husticia pa e forma cu a gasta placa di pueblo, placa di pueblo a caba.

Na 2014 e regimen di Mike Eman a bay busca su solucion cerca Nicolas Maduro na Cuba y Aruba a haya su mes envolvi den loke lo a bira e morto di speransa pa tur cu ta den necesidad.

Hamas Aruba a conoce un gobernacion mas cruel cu gobierno Mike Eman, cu a haci bofon di tur loke Aruba ta kere aden, pa e por a yega na poder. Cu un serie di mentira, cu awe ta rementa den nan cara, e grupo cu a condena Aruba na 2016 na e desgracia di Citgo, a para hari pueblo cu tabata baila mientras Citgo a wordo hipoteca.

A sigui manipula. Te awe ta trata di convence Aruba cu e actual crisis a wordo crea dor di otro. Te awe ta trata di convence Aruba cu di berdad e isla lo a bira rico y cu tur hende lo a baña den abundancia cu e placa cu Citgo lo a basha den scochi di tur hende.

Mientrastanto placa di Citgo a disparce y Aruba tambe ta parti di investigacion di e maniobranan di e partnernan cu gobierno Mike Eman a atrae pa Aruba.

Mester gasta mas palabra na loke gabinete Mike Eman a haci cu Aruba? Mester sigui informa pueblo di e berdad. Pasobra si tin algo den cual gobierno Mike Eman ta experto, ta crea problema, manipula cu pueblo y hunga santo.

Berdad a rementa den cara di abuso. Gobierno Mike Eman no tin hombresa suficiente pa bini dilanti y pidi Aruba dispensa.

Un pregunta ta keda atras cerca pueblo. Gobierno Mike Eman por drumi trankil? Aparentemente si pasobra no ta tur hende ta nace cu consenshi.

E debe nacional, e manipulacion cu BBO, e manipulacion cu crecemento economico cu Citgo ta papia un idioma cla.

Nan ta papia di bofon di nos pueblo, di ciudadanonan den necesidad cu ta wordo uza pa gobierno Mike Eman haci propaganda pa su mes cu e aspiracion di sigui gana salario di ministro cu placa di e pobernan cu ta sirbi como publico pa e show di bofon y abuso mas grandi cu historia di Aruba a registra.

- Advertisement -

DUNA COMENTARIO

Please enter your comment!
Please enter your name here