Home Hudicial 1 aña di prison pa Jamaiquino cu kier a hiba 1.6 kilo...

1 aña di prison pa Jamaiquino cu kier a hiba 1.6 kilo di cocaina New York

127
0
SHARE
- Advertisement -

ORANJESTAD (AAN)  – E homber Jamaiquino L.H. a scucha Hues confirma e exigencia di Fiscal di 1 aña di prison pa a purba hiba 1.6 kilo di cocaina New York. Miembronan di US Custom a ripara cu L.H. tabata bay mucho biaha baño y a resulta cu e tabatin 3 paki di cocaina den su tas di lomba.

Ni Fiscal, ni Hues a kere e storia di L.H. cu ta den baño di hende muher el a haya e pakinan y el a coy nan pasobra el a kere cu tabata pakinan di placa. Segun L.H. e no tabata sa cu den e pakinan tabatin cocaina.

E acusacion cu Fiscal a presenta den Corte contra L.H. ta cu el a exporta un cantidad di cocaina riba 12 Juli 2019 na aeropuerto. US Custom a descubri den L.H. su tas di lomba pakinan di cocaina.

DROGA DEN TAS DI LOMBA

Hues a lesa e raport di US Custom cu ta mustra cu 12 di Juli 2019 L.H. tabata viahando pa New York. El a pasa e controlnan cu tin pero via camera a constata cu e tabata blo bay baño. A dicidi di control’e promer cu e subi avion. L.H. a bisa cu el a haya e pakinan di cocaina den toilette di aeropuerto. Ta asina cu miembronan di US Custom a haya e droganan den un jacket color oranje den e tas di lomba. Hues a mustra potret di e jacket y L.H. a reconoce esaki. Investigacion a mustra cu a haya pañanan di jeans cu L.H. anterior tabatin den su tas di lomba, den e baño.

DROGA SCONDI DEN BAÑO

L.H. a bisa Hues cu e no a ripara cu e pañanan a cay for di su tas di lomba. Durante interogacion L.H. a bisa e miembronan US Custom cu el a bay diferente biaha den baño di homber e no a haya e pakinan y a bay den e baño di hende muher y eynan el a haya e pakinan cual el a coy. E pakinan tabata contene cocaina.

Investigacion cu a haci den baño ta mustra cu den un coy sushi tabatin 3 paki conteniendo cocaina y banda di e coy sushi a haya den un saco di plastic e pañanan di L.H.. Hues a remarca cu e pañanan no tabata benta abou manera L.H. ta bisa. Investigacion a mustra cu L.H. kier a usa e droganan pa body pack pero no a logra tape esakinan. En total 6 paki di cocaina a keda confisca di cual 3 tabata den baño. En total e pakinan a pisa 5.5 kilo di cocaina. Tres paki a pisa 1.6 kilo. Hues a puntra L.H. cuanto paki e tabatin den e tas di lomba. Segun L.H. e no a conta cuanto paki el a coy.

Hues a puntra L.H. pakico el a bay den e baño di muher. Segun L.H. e tabata buscando señal  Wifi y asina el a bay den e baño di muher. El a bisa Hues cu e promer e dos biahanan cu el a bay den baño di homber tabata pasobra e tabatin malo di stoma. Di tres biaha e tabata busca señal y a resulta cu den baño di hende muher el a haya señal y e ora el a mira e pakinan. El a kere cu e pakinan tabatin placa aden y a coy algun.

Hues a bisa cu ta straño cu L.H. a laga su pañanan den un saco di plastic y a haya mas droga den e coy sushi. Segun L.H. e no a pone su pañanan den un saco di plastic y cu e pañanan lo a cay for di su tas di lomba.

EXIGENCIA DI FISCAL

Fiscal a bisa Hues cu despues cu L.H. a pasa US Custom cu su tas di lomba, nan a keda control’e. El a bay dos biaha baño di homber y despues a bay baño di hende muher. El a bay solamente cu su tas di lomba y su maleta di man a keda banda di un kiosk. A dicidi di control’e atrobe promer cu el a bay aborda avion. E ora ey a haya 3 paki den su tas di lomba hinca den un jacket oranje. E pakinan aki L.H. a haya den baño di hende muher. A haya otro 3 paki den e baño di hende muher. Fiscal a bisa cu e pregunta ta si L.H. ta responsabel pa tur 6 paki. Fiscal ta haya cu si. El a mustra cu L.H. a declara na US Custom cu e pakinan ta di dje y a deshaci di algun. Fiscal a bisa cu tur e pakinan tabata mesun cos. Fiscal ta haya cu L.H. ta castigabel y segun maneho di Ministerio Publico, el a exigi 30 luna di prison. Fiscal a sigui bisa cu si Hues ta haya cu L.H. ta responsabel pa 3 paki, e ora ey e ta exigi 12 luna di prison.

ABOGADO

Mr. Carlo a bisa Hues cu e ta haya cu L.H. tabatin 2 paki den su tas di lomba. US Custom ta papia di pakinan pero Douane di Aruba ta papia di 2 paki den e tas di lomba di L.H.. Na opinion di e abogado, segun ley mester por prueba legal y no por tin duda. E abogado ta haya cu L.H. a haya dos paki den e baño di hende muher. El a kere cu e pakinan tabatin placa. E no a mira e otro pakinan. US Custom a controla L.H. dos biaha caba y pesey el a hinca dos paki den su jacket oranje. E abogado a bisa Hues cu e ta kere cu L.H. tabata papia e berdad. E tabata busca señal Wifi. Por mir’e riba camera ta cana cu su cellular ta busca señal. Segun e abogado, ningun momento L.H. a bisa cu e tabata sa cu den e pakinan tabatin cocaina. Ta e miembronan di US Custom a bisa esey y tambe cu e otronan pakinan haya den baño tabata di dje. E abogado a mustra cu US Custom no a bisa L.H. su derecho di asistencia di un abogado y pesey e ta haya cu mester declara L.H. liber pasobra US Custom a faya den investigacion. Tambe abogado mr. Carlo a bisa cu Douane di Aruba a faya den investiga, cual pakinan L.H. tabatin den su tas di lomba. Den baño di muher a haya 3 paki pues en total 5 paki y no 6 paki. El a mustra cu den raport di Douane ta papia cu a haya 2 paki den tas di lomba di L.H. pero no ta bisa cual paki ta di L.H. Pesey haya cu mester declara L.H. liber.

SENTENCIA

Hues a sera tratamento di e caso y a bisa cu e ta dicta sentencia di biaha. Hues ta haya legalmente proba cu L.H. a transporta pakinan di cocaina. Hues a bisa cu e no ta haya L.H. responsabel pa e 3 paki di cocaina haya den baño di hende muher. Na opinion di Hues, e hecho cu Douane ta papia di 2 saco di plastic por bien ta cu tur 6 paki ta den. E pregunta ta si L.H. tabatin e pakinan promer cu el a bay den e baño. Hues a bisa cu por bien ta cu a haya nan den baño. Pesey Hues ta haya L.H. ta responsabel pa 3 paki so. Hues a bisa cu e no ta kere declaracion di L.H. cu el a kere cu ta pakinan di placa. Hues a remarca cu L.M. mester a controla e pakinan. Pa cu castigo, Hues a bisa cu e ta tene cuenta cu castigonan cu ta duna pa 1.6 kilo di cocaina cu tin den tres pakinan. Hues a confirma exigencia di Fiscal y a condena L.H. na 12 luna di prison, kitando tempo sera den KIA. Hues a ordena pa destrui e droga y e pañanan L.H. por haya bek.

 

- Advertisement -

DUNA COMENTARIO

Please enter your comment!
Please enter your name here