Home Hudicial 5 aña di prison exigi pa homber sospecha di ta na cabez...

5 aña di prison exigi pa homber sospecha di ta na cabez di traficacion di droga pa Hulanda y Inglatera

175
0
SHARE
- Advertisement -

E sospechoso ta bisa di por a papia di droga cu otro pero no a haci nada

ORANJESTAD (AAN) – Ayera di oranan di mainta te den oranan di atardi, den sala di Corte di Husticia a trata e caso penal cu Ministerio Publico a cuminsa contra un grupo di 5 persona. Fiscal ta acusa e grupo di ta forma parti di un organizacion criminal cu ta dedica su mes cu traficacion di droga.

Fiscal a mustra riba hopi indicacion y combersacionnan graba cu ta mustra riba traficacion di droga. Fiscal ta considera e homber Colombiano H.M.O. como e cabezante y a exigi 5 aña di prison p’e. E otro sospechosonan, entre otro e señora di H.M.O., a haya castigo combina caminda tres di nan ya caba ta haya libertad cu un parti condicional. E sospechoso mas importante H.M.O. a bisa Hues cu el a papia cu hendenan tocante droga pero no a acepta ningun oferta y tampoco a haci ningun traficacion.

TRAFICACION

E homber di Aruba K.R., e Colombiano biba na Aruba H.M.O. y su pareha dama Arubiano R.M.O., e Colombiano biba na Aruba C.E.V. y e Venezolano A.V.A., ta e cinco sospechosonan cu ayera mainta a presenta den sala di Corte di Husticia pa tratamento di nan caso penal.

Fiscal a bisa Hues cu ta acusa nan di ta forma parti di un organisacion criminal meti den droga. Fisal a acusa H.M.O. tambe di posecion di arma di candela. E homber K.R. tambe Fiscal a acusa di traficacion di cocaina pa Hulanda y posecion di marihuana y bendemento di marihuana. Ta asina cu Fiscal a inclui den e caso aki, documentonan penal di H.M.O., kende a haya castigo di prison pa un caso grandi di droga “Domino”.

E caso ey a haya hopi atencion pasobra Polis, riba instruccion di Fiscal, a bay pone aparato den auto di H.M.O. pa scucha tur loke e ta papia. Esaki a sosode contra ley y esey a pone cu Hues a baha e castigo pa H.M.O. y otronan envolvi den e caso ey.

Awor ta ripara cu un biaha mas ta bolbe usa aparato pa scucha combersacion riba e mesun persona pero e biaha aki si tabata legal.

Fiscal a bisa Hues cu entre December 2017 y 16 Januari 2019, ta sospecha H.M.O. di a haci traficacionnan di droga mientras cu K.R. ta entre Augustus 2018 y September 2018. Ademas hente e grupo ta sospecha di ta meti den organizacion criminal den e periodo di Januari 2019 y Februari 2019.

INVESTIGACION GRANDI

Hues a bisa cu e caso ta hiba e nomber “Sea Land” y cu tur cos a cuminsa ora cu na Inglatera a detene un pareha cu a bin for di Aruba cu 11.8 kilo di cocaina. Ta sospecha cu H.M.O. ta envolvi den esaki. H.M.O. a para riba cu e no a haci nada. Tambe tin un caso na September 2018 caminda un homber N. a bay Hulanda cu un lote di cocaina. Autoridad a gar’e y investigacion ta mustra riba K.R. y H.M.O. Hues a mustra un cantidad di tap di cellular y tanto K.R. como H.M.O. ta para riba cu nan no tin nada di haci cu esey. Tambe tin yamada entre H.M.O. y C.E.V. y otro tocante cocaina cu a yega Hulanda pero ta holo stinki y kico lo mester haci pa kita e holor. Tin combersacion scucha entre A.V.A. y H.M.O. caminda A.V.A. ta puntra H.M.O. pa deal cu un Chines pa 10 kilo di cocaina. A.V.A. a bisa Hues cu el a kere cu H.M.O., kende ta conoci pa e caso grandi di droga “Domino” lo tabatin droga pero H.M.O. a bis’e cu no. H.M.O. tambe a bisa Hues cu por a scuch’e ta papia yen di cos pero na final el a distancia di tur.

EXIGENCIA DI FISCAL

Fiscal a bisa Hues cu e ta haya cu tur 5 sospechoso ta envolvi den e organizacion criminal cu ta meti den droga. Tur ta desmenti esey. Sinembargo Fiscal ta haya cu tin dos caso di transporte caminda H.M.O. ta den back ground pa no ta reconoci. Na opinion di Fiscal, e hecho cu a haya H.M.O. cu arma na su cas, ta mustra cu e ta den organizacion criminal. Fiscal a bisa cu H.M.O. ta mas envolvi cu solamente e dos casonan di transporta droga.

El a mustra riba e tapnan di telefoon cu na opinion di Fiscal ta mustra cu H.M.O. tabata papia di droga y transporte. El a bisa cu cada vez tabatin un otro hende envolvi pa no mustra cu H.M.O. ta e cabezante. El a mustra cu H.M.O. mes a bisa den un combersacion na telefoon cu e ta un narco. H.M.O. tabata bisa otronan pa no bisa nada via cellular pero esey tabata laat.

Fiscal a mustra cu dia 15 September 2018, e homber N. gara cu algo mas cu 900 gram di cocaina likido den un bleki di pasta di coco na Hulanda. E sospechosonan H.M.O. y K.R. ta envolvi den e transporte aki y un muher Manuela. Dia 6 Juli 2018 a detene dos persona na Gran Britania cu 11,8 kilo di cocaina den dos maleta. Nan a bin Aruba pa busca e droga. Esakinan a wordo prepara na un cas na Modanza y H.M.O. ta envolvi den esaki. Fiscal a sigui bisa cu H.M.O. tabata na Inglatera y tabatin yamada pa Inglatera y H.M.O. tambe tabata na Inglatera e aña aki. Investigacion a mustra cu tin algun hende ta huur apartamento pa un periodo cortico y eynan ta laga esnan cu ta busca droga keda. Eynan ta prepara maletanan cu droga. Fiscal a mustra con H.M.O. via telefoon a splica con mester prepara e droga pa e no wordo haya. Tambe con e ta papia cu a manda 12 cosos pero no sa si nan a yega Inglatera. Fiscal a remarca cu apesar cu H.M.O. tabata anda cu cuidao pa no cay den e cadena, H.M.O. mes ta papia di e traficacion y ta mustra cu e ta envolvi den droga.

Pa loke ta e organizacion criminal, Fiscal a mustra cu na September 2018, H.M.O. a papia cu C.E.V. cu tabata na Hulanda cu a bisa cu e paki ta hole y H.M.O. ta splica con mester haci pa kita e holor di acetone y gasoline. Fiscal a mustra riba e compra di whiskey y sigaria na December 2018 cu ta mercancia di e boto ilegal cu a yega Aruba. Aki e dama R.M.O. a paga A.V.A. 1500 dollar pa mercancia. Tambe cu A.V.A. a papia cu H.M.O. pa haci negoshi di droga cu un Chines caminda e Chines kier cumpra 10 kilo. Tambe Fiscal a menciona diferente yamadanan di H.M.O. cu ta indicacion di traficacion di droga.

Fiscal ta haya cu tur e puntonan aki ta mustra claramente cu tin un organizacion criminal cu tabata trafica droga. Tambe el a mustra cu a keda proba cu K.R. tabatin marihuana y a yega di bende. A haya potret den su cel cu hopi paki di placa rond di dje.

CASTIGO

Fiscal a bisa cu droga ta malo pa salud di hende y ta crea hopi criminalidad. E ta haya cu e grupo aki ta contribui na esaki. Fiscal a exigi pa C.E.V. y A.V.A. castigo di prison igual na loke nan ta sinta desde Januari 2019 y 5 luna condicional cu un tempo di prueba di 3 aña prueba. Pa e dama R.M.O. , kende Fiscal a mustra cu el a yega di cay sera caba pa droga, a exigi 18 luna di prison di cual 6 luna ta condicional cu un tempo di prueba di 3 aña.

Pa K.R., Fiscal a exigi 2 aña di prison di cual 8 luna ta condicional cu un tempo di prueba di 3 aña.

Pa H.M.O., Fiscal a mustra cu mirando cu el a yega di cay sera caba pa droga y su posicion di cabezante den e caso aki, el a exigi 5 aña di prison. Hues despues di a scucha defensa di e abogadonan a bisa cu e ta bay studia e caso y dentro di algun siman lo por spera sentencia.

 

- Advertisement -

DUNA COMENTARIO

Please enter your comment!
Please enter your name here