Hobennan lo bay den un leertraject na Parke Nacional
ORANJESTAD (AAN): Minister Rudy Lampe a indica cu a bin cu un reforma di e programa di Scol Pa Ofishi (SPO), cual tabata den discusion.
A bisa cu por fin tin un curriculum estableci. A amplia esaki. SPO tabata conta pa tres aña y aworaki e curriculum aproba ta bira un opleiding di 4 aña pa asina aki yuda e hobennan.
Tin hobennan cu tabata caba SPO cu 15 aña. Tin e ley di leerplicht cu ta te cu 16 aña un hoben mester ta na scol, e mandatario a remarca.
Pesey a amplia e curriculum cu un di cuater aña y un di e trayectonan di e cuater añanan a wordo menciona cu lo por hacie na Parke Nacional den e sistema di un leerwerk traject unda cu hunto cu e maestronan di Hofi Shoco lo guia e hobennan di SPO pa ora cu nan caba nan lo por ta un asistente den loke ta hardineria.
Tur esaki ta parti di e reforma cu tabata tin na Scol Practico di Ofishi ubica na Santa Cruz y na Brazil. Esey ta pa esnan cu ta scoge pa e trayecto ey y na Parke nan lo haya nan stage den e programa di hardin botanico pa cual a firma un acuerdo entre Gobierno y Fundacion Parke Nacional Arikok, Lampe a remarca.
Tin mas scol manera esun di Macuarima, Laura Wernet-Paskel na Cadushi Largo y otronan mas cu ta cerca y cu ta spera tambe cu un dado momento lo haci uso di e hardin botanico aki den construccion, e ministro a señala.
