Exigencia di mundo medico mester di bon uzo placa belasting
*Necesidad cuido medico lo sigui crece cu exigencia grandi
*Hospital di Cinco Strea ni BBO pa AZV tabata e solucion
ORANJESTAD (AAN) — Problemanan serio den mundo di Salud Publico ta sigui manifesta nan mes. Continuamente DIARIO ta wordo confronta cu problemanan cu tin nan reis den situacionnan financiero pero tambe maneho general di Salud Publico.
“E maneho cu a wordo hiba durante ocho aña tabata populista. E tabata dirigi riba loke lo tin resultado positivo pa politiconan na mando den campaña electoral,” expertonan a bisa.
A bay atende loke den bista di pueblo lo a duna beneficio politico pero no a tene na regla basico.
“Un pais tin fondonan pa Salud Publico, di cual Cuido Medico ta parti. E dirigente di Salud Publico ta haya sumanan necesario pa por garantisa cu e derecho constitucional di pueblo ta wordo sirbi. E mester mira con e ta uza e placanan aki,” a wordo treci dilanti.
Gobierno anterior a ciega Aruba cu un hotel di “Cinco Strea” y mil problema. Pueblo por a mira e streanan pero e problemanan a keda scondi pa presenta nan mes despues.
“Ora a bay dicidi kico ta gasta, mester a tene cuenta cu adelanto enorme di cuido medico internacional. Descubrimentonan cientifico, enfermedadnan nobo, mas cliente debi na e hecho cu edad promedio ta subi,” ta algun di e partinan.
Segun informantenan den cuido medico ta bini dilanti con fondonan di pueblo a wordo uza na un momento sumamente importante.
“Mester a gasta tur loke a gasta den un tempo cu hustamente ta evita gasta clinico y ta gasta mas na cuida salud? Por bisa cu AZV ta independiente, pero finalmente ta gobierno pues pueblo ta paga pa AZV tanto cu prima como cu placa di belasting. Pues maneho di cuido medico mester tabata tin reserva pa AZV tambe,” informantenan a mustra.
A introduci un BBO pa AZV pero e problemanan a continua cu poblacion creciente y aumento di exigencia.
Segun informantenan e falta di un acercamento structural pa cuido medico a keda existi y a haya un faceta extra cu un hospital yen di problema pa motibo di entre otro fayonan den construccion.
Informantenan di DIARIO ta mantene nan punto di bista cu mester atrae expertonan internacional, si ta necesario cu ayudo di Hulanda, pa yega na un reorganisacion total di cuido medico.
“Remedinan nobo, aumento personal cuido specialisa, aparatonan y ekipo maneha pa profesional, mester ta parti di un solo acercamento,” a wordo mustra.
E situacion actual ta peligroso y no ta honra Constitucion cu tin bienestar di e ciudadano central.
