ORANJESTAD (AAN) – Recientemente durante un bishita cortico, Sr. Arjan de Groene, consehero di “World Wildlife Fund Netherlands” (WWF-NL) a reuni cu varios persona y entidad clave, entre nan, su Excelencia Gobernador di Aruba, Sr. Alfonso Boekhoudt, Directie Natuur & Milieu, Universidad di Aruba, y tambe Fundacion Parke Nacional Aruba (FPNA) cu tawata encarga cu e programa di bishita di Sr. De Groene.
E contacto cu Sr. De Goede a wordo estableci door di Sra. Hellen van der Wal, miembro di e hunta di supervicion di FPNA kende porcierto a wordo apunta recientemente como president di “Dutch Caribbean Nature Alliance” (DCNA), unda su enfoke ta pa mantene e islanan cu ta partner cu DCNA esta, Curaçao, Bonaire, St. Maarten, Saba, St. Eustatius y Aruba, uni y conecta cu partnernan internacional.
Durante su bishita, Sr. De Groene lo sondia e posibilidadnan pa connecta Aruba tambe cu e 8 obhetivonan cu ta central den e organisacion di WWF-NL, asina formando un base igual cu e otro islanan.WWF-NL ta sostene un medio ambiente sano pa tur hende, enfokando ariba un total di 8 obhetivo global cu mira pa un cambio den biodiversidad prome cu aña 2030.
E 8 obhetivonan global di WWF-NL ta: “Wildlife, Ocean, Forests, Food, Climate, Freshwater, Biodiversity, Man and Behavior”.
Segun Sr. De Groene, WWF-NL ta traha principalmente riba e islanan di Bonaire, St. Eustatius y Saba, ya cu naturalesa no conose barera mi a acepta e invitacion di DCNA hunto cu FPNA pa asina conose diferente organisacion, persona y proyectonan na Aruba.
Aunke tur isla ta diferente, e problemanan y por lo tanto e solucion na e problemanan aki ta hopi comparabel. E situacion riba tur isla encuanto coral y e poblacion di pisca ta alarmante, pa cual lo mester coordina e desaroyo economico y conservacion di nos naturalesa den un manera balansa.
Partnernan riba e otro islanan por siña hopi di Aruba su conocemento y experticio, sin laga afo cu Aruba tambe por siña hopi di e otro islanan. Ehempelnan clave ta restoracion di flora, planificacion di Parke Marino, reduci e cantidad di plastic, colaboracion pa entre otro sondeo scientifico y hopi mas. Cu mi bishita mi ta spera di por descubri e rol cu WWF-NL por tin den e proceso aki.
Durante e luna di october DCNA lo sigui fortifica e laso entre e islanan unda cu lo tin varios presentacion y workshop na Bonaire. Adicionalmente lo tin un “Junior Ranger Exchange” organisa dor di DCNA en colaboracion cu FPNA y Stinapa, subsidia dor di WWF-NL, Rabobank, Stinapa y DCNA, unda e Junior Rangers di tur e isla lo bini hunto pa asina toca e tema di conservation di nos bida marino y costanan.
