ORANJESTAD (AAN): Directora di ATA Sui Generis, Ronella Tjin Asjoe-Croes a mustra cu nan ta respeta e derecho di trahadornan pa protesta. E ta referi aki na e accion di 60 minuut cu empleadonan di Aruba Tourism Authority a tene Diabierna cu a pasa den oranan di atardi.
E Directora no kier a bay tur detaye, pero ta subraya cu nan ta respeta e derecho di trahadornan. “E ta parti di un democracia, pues no tin ningun objeccion pa esaki,” Tjin Asjoe-Croes a bisa.
Na tur momento nos ta dispuesto como e equipo di maneho di ATA pa scucha e trahadornan y dialoga riba nan diferente pensamento, y esey lo continua di ta e forma tambe con nos ta maneha ATA,” Tjin Asjoe-Croes a indica un poco despues di e accion di trahadornan.
Manera DIARIO a trece dilanti caba, e empleadonan di ATA cu ta afilia na Sindicato STA a tene un accion di 60 minuut pa demostra nan malcontento cu e impasse cu ta yegando 1 aña caba pa negocia un Contrato Colectivo nobo. Nan ta mira ATA ta produci ganashi grandi, pero ta asombra cu ni un miserable 150 Florin di aumento no kier duna e empleadonan, siendo cu esnan den top si ta ganando salario astronomico.
Segun Tjin Asjoe-Croes, despues di e accion, nan mes a dicidi pa organiza un reunion habri pa tur persona na ATA pa asina por haci pregunta y nan por duna splicacion.
E Directora a bisa cu den ultimo simannan ta diferente reunion a tuma lugar, y hasta Mediador di Gobierno tabata presente. Ultimo biaha cu a reuni cu Sindicato tabata Diaranzon como tambe Diahuebs y asina a pasa den diferente proposicion.
ATA a bin cu nan contra-proposicion riba un proposicion di STA di 18 September. Diaranzon mainta a papia riba esey y a yega na un punto di posible pakete pa empleadonan. A mande Diaranzon atardi mes pa STA.
Diahuebs mainta a bolbe topa na Oficina di Mediador, y aki Sindicato STA a bin cu su pensamento cu tabata bastante diferente di loke a papia di dje e dia anterior. Sinembargo a sigui na mesa, y a pusha pa yega na algo y a pensa cu nan lo a sali di sala keriendo cu e lo bay ta e acuerdo final.
Pa nan sorpresa, Diabierna a bin nota cu esey no ta e caso.
Tjin Asjoe-Croes a bisa cu loke a papia Diahuebs mainta den reunion, a wordo manda por escrito e mesun atardi. Ainda nan ta sperando contesta riba e carta aki. Como mey ora prome cu e protesta di e empleadonan, a haya carta di STA bisando cu lo bay den accion y mesora a duna contesta pa bay bek riba e propuesta di 18 di September.
Segun Ronella Tjin Asjoe-Croes, esey nifica cu tur e reunionnan cu a tuma lugar riba Diaranzon y Diahuebs unda a pone hopi esfuerzo pa trata na yega na un solucion y keriendo cu a logra esey, a resulta di no ta e caso.
E Directora a bisa cu lo sigui cu nan esfuerzonan y a bisa cu nan lo bay directo cu e dialogo cu empleadonan.
