Home Parlamento Cu su discurso e lider di AVP ta haci uso di un...

Cu su discurso e lider di AVP ta haci uso di un situacion hopi serio, atrobe pa oportunismo

113
0
SHARE
- Advertisement -

Lider di fraccion di MEP Rocco Tjon:

ORANJESTAD (AAN) – Fraccion di MEP a yama un conferencia di prensa Diabierna, den cual Parlamentario Rocco Tjon, lider di fraccion, a referi na e reaccion di e lider di AVP, tocante e hecho cu gobierno a tuma e decision di no ratifica e ley di supervision financiero temporal.

E parlamentario a expresa cu e ta lamenta profundamente, con ex-minister presidente ta haci uso di un situacion hopi serio pa oportunismo.

Tjon a bisa cu expresando ex-premier su discurso ora cu e ta bisa cu door cu aworaki no tin normalidad, pero tin engaño y cu tin politiconan sin principio y caracter, Aruba ta den e situacion cu tin awe.

E lider di fraccion di MEP a subraya cu enberdad sr. Eman no a duna un rueda di prensa sino un discurso cu e medionan di prensa comprometi, no tabata tin ni un pregunta cu a wordo haci.

Parlamentario Tjon ta señala cu e preguntanan cu mester a haci na e-premier ta: bao liderazgo di ken Hulanda a cuminza hunga un rol, pa loke ta trata Aruba su finanzanan publico? Ken a entrega Aruba su autonomia, na 2014 y 2015 y pa ki motibo?

Segun e parlamentario mescos cu pa motibonan di oportunismo, e ex-prome minister, na añanan 2014-2015 y 2017 a crea presupuestonan ficticio, pa e mesun oportunismo awor el a sali duna un discurso.

Rocco Tjon a bisa cu ora e lider di AVP ta insinua cu democracia a cambia den dictadura, e ta kere cu sr. Eman a lubida e protocol cu el a firma na 2015.

Den dicho protocol ex-prome minister a firma  e tempo ey (Tjon ta acentua), ta palabra bon cla cu e ta permiti Hulanda, cu si Parlamento e tempo ey desea locual e cu Hulanda a palabra, e ta duna Hulanda autoridad pa interveni, y esaki ta e diferencia cardinal cu e protocol cu gobierno di MEP a firma cu Hulanda.

E asunto aki ta hopi serio, e lider di fraccion di MEP a subraya, y no ta ora di hunga politica, pero ta momento pa gobierno na un manera serio drecha e finanzas publico di nos pais, y Parlamento atravez di su trabao, salvaguardia esaki.

Fraccion di MEP a bisa for di inicio den Parlamento, cu hamas Hulanda por interveni den un Estado di Derecho pa motibo cu Parlamento a haci un cambio.

El a splica tambe cu Diahuebs Fraccion di MEP a haya hopi pregunta. Por ehemplo si gobierno no a ratifica e ley? Si esey kiermen cu amienda di fraccion di MEP no a wordo ratifica pero e ley si? E parlamentario a señala cu un amienda ta parti di un ley, y un ley so tin. Tin un ley di supervision financiero temporal cu no a wordo aproba. Esaki kiermen cu di facto, e ta bek na comienzo.

Esaki ta nifica cu ainda Hulanda no tin autoridad pa interveni via un Landsverordening, pasobra esun anterior a vence y cu gobierno ta sigui cu su maneho responsable ancra den e protocol y den e maneho financiero-economico y esey ta realidad cu Aruba ta biba awe, segun parlamentario sr. Rocco Tjon.

- Advertisement -

DUNA COMENTARIO

Please enter your comment!
Please enter your name here