Home General Aunke a comproba cu den menos cantidad, ainda tin sushi ta drenta...

Aunke a comproba cu den menos cantidad, ainda tin sushi ta drenta lama

76
0
SHARE
- Advertisement -

Castro Perez di Aruba Reef Care Project: Por mira progreso di e concientisacion

ORANJESTAD (AAN):  Aunke cu e organisadornan di Aruba Reef Care Project a comproba cu cada biaha tin menos sushi bou di lama, principalmente ariba e rifnan di coral y tambe na e sitionan di sambuya, ainda tin sushi ta drenta lama.

Ainda falta hopi trabou pa haci riba e tereno di proteccion y conservacion di costa, beach, rif y otro flora y fauna di nos isla.

Den transcurso di añanan, por bisa cu e cantidad di participante a aumenta (casi 900), mientras cu por bisa cu orguyo cu e cantidad di sushi colecta si ta bahando. Un indicacion di e exito di e esfuerso comunitario aki.

Por menciona cu esnan envolvi tambe ta raportando cu nan tambe ta mira e progreso di concientisacion y accion continuo. Tin sitionan popular di buceo, unda door di esfuerso conhunto e cantidad di desperdicio visibel awendia ta mucho menos cu loke e tabata na comienso.

Di otro banda tin preocupacionnan ainda pa e echo cu sushedad for di fuentenan for di tera, sea accidentalmente of a proposito, ta keda yega lama cu e biento fuerte di nos isla.

Sitionan unda hopi hende ta bay beach pa recreo, hopi biaha ta haya desperdicio regularmente ainda. Esakinan mester bira enfoke di futuro concientisacion y cual e organisacion lo aporta a largo plaso. 

CENTRO DI OPERACION 

Manera a anuncia, dia 29 di september proximo Neptali Henriquez Park ta atrobe e centro di operacion pa e di 25 Aruba Reef Care Project. For di eynan lo coordina e accion y tambe lo ta e punto central pa acumula e datonan.

Mas cu claro e acto ceremonial di clausura y gradicimento na boluntarionan tambe lo tuma lugar na e sitio mes, e diadomingo atardi di 29 di september.

SITIONAN

E sitionan cu lo bay cubri ta entre otro tras di Faro California, Arashi, Boca Catalina, Malmok, Hadicurari, e beachnan dilanti di e hotelnan na Palm Beach, Eagle Beach, Surf Side, Mangel Halto, Baby Beach, Santana di Cacho, Grape Field, Boca Grandi, area rond di Neptali Henriquez Park pa cas di Gobernador y tambe den e area di Bushiri Beach Resort.

Ta apela na henter comunidad pa conhuntamente manifesta e compromiso cu medio ambiente pa yuda mantene nos beach y lama limpi. Varios operador di watersport a compromete nan mes pa yuda cu e operacion den awa. Organisadornan ta invita tur grupo ambiental, club social, scout, scol y tambe boluntarionan pa contribui na e campaña.

Ta remarca cu esnan cu kier participa por tuma contacto cu nan operador di deporte acuatico faborito of tuma contacto cu ARCP y puntra pa Castro Perez of Veronica Perez.

Tur participante, ademas di e satisfaccion di haci Aruba limpi, ta ricibi un t-shirt pa un donacion di 5 florin, sandwich, awa, soft drinks y durante e celebracion final Diadomingo 30 di september na Neptali Henriquez Park lo ricibi un certificado di aprecio y por participa na rifa pa diferente premio atractivo.

Ta conta ariba e apoyo di henter e comunidad di Aruba pa yuda proteha e recursonan natural.

- Advertisement -

DUNA COMENTARIO

Please enter your comment!
Please enter your name here