Home Hudicial Awe sentencia ta cay pa homber Canades gara cu 35 kilo di...

Awe sentencia ta cay pa homber Canades gara cu 35 kilo di marihuana na aeropuerto

56
0
SHARE
- Advertisement -

ORANJESTAD (AAN): E homber Canades D.L.B., awe mainta ta presenta den sala di Corte di Husticia di Aruba pa scucha kico Hues su decision ta den e caso penal cu Fiscal a cuminsa contra dje. D.L.B. dia 3 di Februari 2019 a purba drenta Aruba cu 35 kilo di marihuana.

Miembronan di Douane a ripara comportacion sospechoso di D.L.B. y asina a bin haya 35 kilo di marihuana den dos maleta. Fiscal a exigi 20 luna di prison pa D.L.B. Abogado mr. Illes a bisa Hues cu D.L.B. ta responsabel solamente pa e 10 kilo cu e tabatin den su maleta. E otro maleta D.L.B. no por para responsabel p’e.

   LOTE DI MARIHUANA:

Na Augustus 2019 tratamento di e caso a tuma lugar caminda Hues a mustra cu dia 3 Februari 2019 mas o menos 4’or di atardi, miembronan di Douane a mira D.L.B. cu a nenga di pasa maleta den e scan. El a bisa cu e maleta grandi no ta di dje y cu e falta un maleta biña. A bay na e belt caminda e maletanan di e vuelo cu D.L.B. a bin Aruba y a mira e maleta biña.

A puntr’e si esey ta su maleta. E tabata duda pa contesta. E ora ey a bis’e pa habri e maleta grandi. El a habri esaki y a bolbe ser’e. El a bisa cu e dos maletanan grandi preto ta di conocirnan y no ta di dje. E no kier a bisa si e maleta biña ta di dje.

Miembronan di Douane a habri e maleta y a haya cantidad di pakinan. Den e otro maleta grandi tambe tabatin cantidad di pakinan. Investigacion “field test” a mustra cu e pakinan tabata contene marihuana.

E ora ey el a worde deteni y e maletanan a keda confisa y duna na miembronan di narcotica. A confisca tambe dos cellular y un cantidad di Dollars. En total 69 paki a confisca esakinan a pisa mas o menos 35 kilo di marihuana.

Segun D.L.B., e tabata den necesidad di placa y nan a introduci’e na Rally. El a bisa cu e no sa nomber completo y tampoco no tin number di cellular di Rally.

Hues a bisa cu riba cellularnan di D.L.B. a haya mensahenan cu ta duna impresion cu e tabata traha pa Rally. Segun D.L.B. e ta un hungador di basketball y Juli 2019 e tabata pa bay hunga professional. Tambe el a bisa cu e tabata bayendo Universidad na Canada y tabata falta un trimester so pa e caba. El a bisa Hues cu el a bin cu solamente 1 maleta cu marihuana.

Hues a bisa cu for di mensahenan riba cellularnan por compronde cu el a haya oferta pa transporta 1 kilo pero e no a acepta esaki. Despues el a acepta e otro oferta di Rally. Hues a mustra cu Rally a bisa D.L.B. cu e lo bay cu dos dama y cu nan lo no papia nada.

Hues a bisa cu e dama O. a declara cu e dama S., un bon amiga di dje, a invit’e pa bay cun’e cu D.L.B. El a bisa cu el a duna S. placa pa cumpra e ticket. El a viaha cu un maleta di man. S. a bisa cu e tin relacion cu D.L.B. desde 2018 y cu D.L.B. a paga pa nan ticket.

Hues a bisa cu for di investigacion a sali na cla cu tur e pakinan ta mesun cos. Ta sospecha cu tur e cargamento di droga ta di e mesun traficacion o sea di D.L.B. Ariba puntra di Fiscal, D.L.B. a bisa cu e lo haya 3 mil Dollar pa transporta e droga. Fiscal a bisa cu D.L.B. tabata riba snap chat un rato. Segun D.L.B., el a informa Rally cu autoridad na Aruba a gar’e pa e no pensa cu D.L.B. a horta e droga.

Hues a bisa cu for di camera di seguridad na aeropuerto, a mira D.L.B. y e otro damanan tabata mishi cu e maleta biña. Tabata sospecha cu e a kita e label cu lo tabata riba e maleta. Segun D.L.B. e tabata mira e maletanan riba nan label. Hues a remarca pakico e tabata mira e maleta biña siendo cu e tabatin maleta preto. Fiscal a bisa cu a haya un label cu nomber di D.L.B. y un otro nomber. Hues a bisa cu no tin claridad unda a haya e labelnan aki.

   EXIGENCIA DI FISCAL:

Fiscal a bisa cu a haya D.L.B. cu un maleta mientras cu riba belt a haya dos otro. A mira riba camera cu e sospechoso D.L.B. tabata mishi cu e otro dos maletanan. D.L.B. a bisa cu el a haya e maleta di Rally y cu e no sa di e otro maletanan.

Fiscal ta haya cu D.L.B. tabata sa di e tres maletanan. El a mustra cu riba e mesun vuelo a haya e tres maletanan y tur tabatin e mesun tipo di pakinan. Riba cellular tabatin mensahe pa e transporta droga pa Aruba. E ta haya cu D.L.B. y e otro dos damanan ta envolvi den e importacion di e 35 kilo di marihuana. Fiscal a bisa cu tin hopi problema den Caribe cu traficacion di droga.

D.L.B. tabata sa cu tabatin droga den e maletanan. El a exigi 20 luna di prison pa D.L.B. Tambe Fiscal a exigi pa destrui e lote di marihuana. E placanan lo keda confisca.

   ABOGADO:

Mr. Illes a bisa Hues cu e pregunta ta si D.L.B. ta responsabel pa e total 35 kilo di marihuana. E abogado ta haya cu no ta asina. E abogado ta haya cu D.L.B. tabata un mula y tabatin un maleta di man y un maleta grandi. E maleta tabatin 10 kilo di marihuana. El a señala cu riba un di e labelnan tabata riba nomber di un tal Reed. Den avion tabatin un pareha Reed pero no a persigui e personnana aki.

Na opinion di e abogado, por bien ta cu e otro dos maletanan tabata di Reed. E abogado a sigui bisa cu D.L.B. tabata mishi cu maletanan pero no por prueba cu el a check in e maletanan aki na Canada.

No tin ningun prueba cu e maletanan ta di D.L.B. E hecho cu el a menciona color biña no ta mustra cu e maleta biña ta di dje. E abogado a bisa Hues cu por ta posibel cu Rally a manda otro personanan cu maleta cu droga. Sa sosode mas biaha cu traficantenan ta usa mas mula pa transporta droga. Segun mr. Illes, for di camera di aeropuerto no por bisa cu D.L.B. a kita e label di e maletanan. E abogado ta kere cu mester castiga D.L.B. pa solamente e mas o menos 10 kilo cu e tabatin den su maleta. E ta haya exigencia di Fiscal ta mucho halto. E abogado ta haya e castigo cu D.L.B. a sinta ta suficiente. Awe mainta sentencia ta cay y DIARIO ta informa lectornan di esaki.

- Advertisement -

DUNA COMENTARIO

Please enter your comment!
Please enter your name here