Home Politica Benny Nisbet sorprendi cu hopi a protesta Hotel pa San Nicolas pero...

Benny Nisbet sorprendi cu hopi a protesta Hotel pa San Nicolas pero ni un grito cu lo tin mas Hotel pa pabao di brug

264
0
SHARE
- Advertisement -

ORANJESTAD (AAN): Segun Benny Nisbet di PPA, ultimo siman a tabatin  2  publicacion cu probablemente lo bin 2 Hotel mas pabao di brug, y kizas lo bin mas.

Segun e lider di PPA, e noticia aki a worde ricibi cu un silencio notable.  No tabatin ni un declaracion encontra.  Ningun ciudadano, ni instancia a critica ni cuestiona unda Aruba lo saca mas trahador.  Nada y nada.

Contrario na e gritonan emocional contra construccion di un hotel na Sero Colorado riba un tereno cu e ultimo 10 tabata worde destina pa construccion di eventual Hotelnan. Un horcan di protesta y gritonan cu San Nicolas  lo no tin e infra-structura pa un hotel grandi asina, y cu Aruba ni San Nicolas lo NO tin  trahado pa traha den e hotel.  Tambe storia cu e construccion lo kibra e cueba y tunelnan na Sero Colorado, etc.

PPA kier a referi na e dos publicacion den prensa local cu a informa cu lo bin mas construccion o re-construccion di  mas hotel y/of Condominiums  pabao di brug esta Oranjestad y Noord, etc.

   PROYECTO ‘PORT CITY’:

PPA ta referi na un articulo cu ta ensera declaracion di director di APA NV bao di e titulo: “Proceso pa duna inicio na e ‘Port City’ ta den full swing” fecha 9 di September 2019 den prensa local.

El a sigui cita: “E proyecto (Port City!) ta hopi bunita. Ta inclui un combinacion di ‘Boutique hotel’, Condominiums, y evaluando tambe un ‘Conference Entertainment area’ cu na final no lo por bay crea un molester di sonido pa e bisiñanan”.

Tabata notable con den e districtonan cu tin mas Hotel esta Oranjestad y Noord declaracion hopi cla a worde haci cu ta bin mas y NI un declaracion encontra, Ni un grito encontra.

Loke PPA ta conclui y puntra, ta si acaso simplemente tin un descriminacion contra distrito y pueblo di San Nicolas?

“Nos pueblo ta sirbi pa traha como trahado pa hotel pabao di brug so pero cu San Nicolas lo no mag di tin su propio desaroyo di hotel.  PPA ta cuestiona con riba e tereno cu mas valor na e momento aki riba nos Isla esta e tereno banda di nos haf esta nos ex Free Zone  ta scoge pa e.o. simplemente construi Boutique Hotels y Condominiums”.

Nisbet a sigui: “E tereno aki mester por worde usa pa un desaroyo cu lo  diversifica nos economia manera un Aruba World Trade Center  eynan si permiti hotel lo e mester bira ‘business hotels’ cu lo diversifica nos economia double. Pero pa tende di  mas ‘ Boutique Hotels y Condominiums’, PPA ta cuestiona e  plan aki seriamente. Fuera cu ta masha poco informacion nos pueblo a worde duna di e asina yama ‘Port City’  cual plan a worde prepara bow di e gobierno anterior door di APA NV y Port of Amsterdam.”

Segun Nisbet, e ta insisti cu cu pueblo tin derecho riba mas informacion anto informacion completo kico e vision aki ta encera.

   RADISSON BLU HOTEL:

Siman pasa a publica di cu e ex-Aqua Condonimiums a wordo cumpra pa oyro inversionista, y e lo cambia pa un Hotel cu inversion di 80 miyon Dollar, y ta bira un Radisson Blu.

E ta un hotel di 208 camber y mester di 190 empleado.  Eynan tambe, ni un grito di protesta, nada.  Djis silencio!  E ta un aceptacion kizas, pasobra e ta pabao di brug.

Nisbet ta puntra, unda esnan cu ta protesta supuestamente cu tin di trece mas trahado di exterior a keda?   Of kizas pabao di brug no tin problema, pero na San Nicolas si?

Segun Benny Nisbet, Partido PPA sinembargo no ta contra e desaroyo aki! Al contrario PPA ta di opinion cu e desaroyo aki ta positivo!  Esaki ta cuadra cu loke PPA ta cualifica como ‘eleva nos producto Aruba’.  Ora gobierno Wever Croes a publica cu lo construi un 5 star hotel  na Palm Beach, PPA a sostene  esaki pasobra nos vision ta cu Aruba no por keda cu e product cu e tin pero cu Aruba mester eleva su producto turistico y Aruba mester di  a lo menos tres hotel di 50-Star!

PPA ta sostene cu ta eleva e ex-Aqua Condominiums pa Radisson Blu, pa mehora e producto turistico.  PPA kier a  felicita  tanto  e  inversionista cu a cumpra e  Condominium y a dicidi di inverti ainda mas y tambe gab Wever Croes esta Ministro Dangui Oduber cu e logro aki. Nos ta convenci cu e lo contribui na progreso di producto turistico di Aruba!!

   SAN NICOLAS CU DERECHO PA DESAROYO:

Y pa loke ta trata e  Hotel Secrets cu lo mester worde construi na Sero Colorado, manera Nisbet a declara caba, PPA  no tabata pro  ‘All Inclusive hotels’ pariba di Brug, sin embargo ora cu a bira evidente cu e  Upgrader lo no bin of lo no bin pa basta tempo e unico proyecto cu lo sirbi como un ‘yabi’ pa desaroyo na San Nicolas a resulta e  proyecto di Hotel presenta pa Ministro Otmar Oduber.

Despues di a analisa esaki den seno di directiva di PPA  nos a dicidi di sostene e proyecto aki!

Nos ta siguiendo su desaroyonan cual ta bayendo  positivo y nos ta ripiti nos pabien y sosten pa e proyecto Hotel Secrets na Sero Colorado.

PPA a usa e terminologia di ‘pabao di brug’ y  ‘pariba di Brug’ no pasobra nos kier  pero pasobra nos ta sinti esey diariamente cu nos lesa e gritunan emocional contra desaroyo di pariba  y ora nos  nota e silencio ora ta trata e mesun desaroyo pa pabao.   Ta  un Aruba nos ta  y nos ta sostene desaroyo rond di Aruba  y nos ta pidi pa duna sosten na desaroyo na San Nicolas o pariba di Brug tambe .

- Advertisement -

DUNA COMENTARIO

Please enter your comment!
Please enter your name here