Ezzard Cilié:
ORANJESTAD(AAN): Algun tempo atras Hospital a palabra cu prensa cu 1 biaha pa luna lo tene un encuentro cu prensa, unda cu lo duna informacion riba e ultimo desaroyonan rond di Hospital, of cualkier informacion importante cu tin di haber cu Hospital.
Diahuebs tabata un di e encuentronan aki, cu a inclui tambe un tour den e hospital, pa prensa haya un bista di e renovacion cu ta tumando lugar.
Prome cu e tour, durante un conferencia di prensa, prensa a haya e oportunidad tambe pa hasi pregunta.
Ezzard Cilié, Director Medico di Hospital, a cuminza na papia riba locual a sosode Diamars y Diaranzon na Hospital.
“Atrobe nos tabata tin un incidente relaciona cu trabaonan cu ta wordo hasi y no ta prome biaha”.
“Un biaha mas el a afecta e parti di e departamento di Radiologia”.
“E consecuencia di esaki ta cu hendenan tabata tin molester di holo y di cierto trabaonan cu ta wordo hasi”.
Esaki segun Cilié, kende a sigui bisa cu e situacion no ta bon ni pa pashent ni pa e empleado.
“Pa e motibo ey nan mester a sali for di e lugar y claramente e servicio no por a sigui”.
“A base di esey mi por bisa boso cu e sindicato a tene un rueda di prensa y den esaki e presidente di e sindicato a indica hopi bon kico e problema ta na Radiologia”.
“Nos a sinta cu e sindicato hunto cu Mediador Diaranzon, pasobra eingelijk e empleadonan mes ta hopi fada di e situacion”.
“Nan a expresa na mi cu cada biaha nos ta priminti cu nos ta bay drecha e situacion y cada biaha nos no ta logra y cada vez e problema ta bin bek”.
Esaki segun Cilié, kende a sigui bisa cu Hospital mes no ta esun cu ta e experto cu por traha e deal cu e tipo di cosnan ey y cada vez Hospital ta depende di asistencia di afo of mester lage pa esunnan cu ta construi aki.
“Ta door di nan procedimento, nos ta sinti e efectonan di nan trabaonan”.
“Hunto cu mediador a wordo dicidi cu nos mester escala e asunto aki, pasobra ta yegando un momento unda cu pa nos e no ta aceptable mas”.
“Bo no por interumpi e servicio medico cu ta tumando lugar na Hospital cada biaha, pa motibo di e holo aki”.
Esaki segun e director medico, kende a indica cu Hospital no tin e solucion pa esaki.
El a indica cu un hende mester tuma e responsabilidad y bisa cu e ta bay tuma encargo pa esaki wordo soluciona na un manera definitivo.
A base di esaki tabata tin un reunion planea cu e Minister di Salud, Diahuebs mes.
“Mester bin un solucion, pasobra no ta e manera pa trata ni e pashent ni e empleado”.
“Pues eingelijk mi ta di acuerdo cu e sindicato, cu e cos aki mester caba”, segun Cilié.
