ORANJESTAD (AAN) — Durante e vacacion di scol Boolchand’s tabata tin nan promocion di “Back to School” manera tur aña.
E aña aki a añadi e concepto cu cada cliente lo por opta di hasi un donacion di minimo $1 na Imeldahof y Boolchand’s lo a doble e montante na final di e campaña.
Pa ta e prome biaha den historia cu Boolchand’s a organisa e tipo di recaudamento di fondo tabata un sorpresa agradabel pa wak con e clientela di Boolchand’s a duna sin pensa dos biaha.
A wak muchanan cu ta bin cumpra wega pa nan mes y dona p ayuda e mucha nan di Imeldahof di nan mesun placa! Tambe por a wak cliente ta duna mas cu un $1 y asta esnan cu no a cumpra ningun producto y a dona.
Cu e donacion di e cliente a logra recauda AWG 4175,- y manera menciona Boolchand’s a doble e montante pa asina a yega na e montante final di AWG 8350,- . Tambe tur esnan cu a dona lo tabata tin e oportunidad pa participa pa gana un di e 22 premio nan cu a wordo dona na Boolchand’s door di marca nan renombra manera JBL, Bose, Nikon y mas.
Diarason dia 28 di augustus e representante di Boolchand’s a bishita Imeldahof pa asina hasi e entrego symbolico di e donacion di e campaña di “Back to School”.
Directora di Imeldahof Natalia Hernandez a tuma tempo pa duna un guia pa mustra e compleho di Imeldahof na e representante di Boolchand’s y asina splica e gran necesidad y tambe futuro projecto pa locual ta trata Imeldahof.
Sra. Natalia a expresa cu lo kier usa parti di e placa pa inverti den electronica nan pa e mucha nan sinti nan mas na cas durante nan estadia na Imeldahof y tambe pa hasi nan biba uno mas facil y placentero.
Boolchand’s y Imeldahof lo kier a gradici cliente y pueblo di Aruba pa nan donacion durante e campaña aki.
