ORANJESTAD (AAN): Informacion cu DIARIO a haya ta cu diamars anochi e Centro di Coordinacion y Rescate (RCC) di Guardacosta na Corsow a detecta un boto cu a sali for di zuid cu destino Aruba.
RCC siguiendo e circumstancianan sospechoso bao cual e boto tabata navega, RCC a dirigi un Metal Shark te na e boto pa controla abordo.
E boto, Huracan, a wordo acompaña door di Metal Shark te na Aruba. Durante un inspeccion den Huracán, a haya e capitan cu documentonan di despacho d aduana di Colombia falso.
E capitan a bin Aruba pa e comercio di pisca y tabata tin hopi pisca abordo pa e mercado di Aruba. Durante un control realiza pa e Departamento di Salud Publico, e pisca abordo a wordo rechaza pasobra e no a wordo almacena na un temperatura adecua, locual a trece cune cu el a putri.
E autoridadnan a nenga e capitan e acceso na Aruba a base di e hechonan y a solicita pa bandona e isla. Na momento di su partida, e barco a wordo sigui pa medio di e radar di Guardacosta, pero na cierto punto RCC a observa cu a barco a dal un vuelta y a bin bek Aruba.
E capitan a informa cu tabata tin problema cu e motor y cu no tabata por continua e viahe. E capitan a haya permiso di e autoridadnan pa drecha e motor, pero nan a bise cu e lo mester a bandona e isla inmediatamente despues.
Durante e di dos intento di e boto pa bandona e isla, RCC a monitorea Huracán te na momento cu esaki tabata pafo di e awanan teritorial di Aruba.
