Home Parlamento Calidad y acesibilidad di centro di cuido di mucha y hoben mester...

Calidad y acesibilidad di centro di cuido di mucha y hoben mester keda puntonan di prioridad riba agenda

41
0
SHARE
- Advertisement -

Parlamentario Jennifer Arends-Reyes

ORANJESTAD (AAN): Segun Parlamentario Jennifer Arends-Reyes, calidad y acesibilidad di opvang of centro di cuido di mucha y hobennan mester keda halto riba agenda.

Na momento cu pais Aruba conoce cu 1 di cada 5 cas cu ta cay bao di categoria cu ta pasando den pobresa, ambos mayor ta traha, na momento cu Aruba conoce 24 caso di un of otro tipo di abuso di mucha pa luna y 150 caso di abuso domestico pa luna! Y tin 18 miyon pa aña disponibel pa yuda combati entre otro e tematicanan y ta solamente 3 di e 31 proyectonan ta mustrando avance significante y mayoria di e fondo no ta yega su destinacion nos tin un problema serio.

Aruba conoce ley di 2017 cu ta na beneficio di e bienestar y proteccion di muchanan cu ainda no por bin na vigor pa motibo cu no kier apunta un inspector, tin plannan nobo, fondonan disponibel pa ehecuta plan y proyectonan na beneficio di nos muchanan y ta tuma nota cu por ehempel di 156 mil florin disponibel ta 38 mil florin so ta wordo uza pa promocion y viahe solamente pa por ehempel proyecto manera Opvoedvisie, proyecto di mester haña subsidio manera voor en naschoolse opvang ta den cora, no ta yegando na e fondonan.

Si tin asina hopi melding y necesidad pa e tema di kindermishandeling di con nan no ta yegando na e fondonan. E uitputting di e fondonan aki no ta bayendo bon, y tume como un critica constructivo pa e gobierno aki, mester bay wak di cerca di con e fondonan no ta yegando na e destinacionnan, si nos ta den un crisis manera cu e situacion ta mustra, no por sigui presenta Parlamento cu cifranan y tabelnan insuficiente asina, mester tuma mas accion, segun e parlamentario.

No ta Arends-Reyes ta bisa, ta e resultadonan ta papia pa nan mes, tin demasiado proyecto cu no ta yegando na nan fondo y den e tempo cu ta transcuri e situacionnan no ta wordo alivia. Ta comproba cu si no inverti den ‘early childhood development’ y aplica ‘early childhood intervention’, pa ora cu kier bay haci diferencia den bida di hoben y adultonan ta un trabao cu di chikito mester a cuminsa cun’e.

Mas mucha y hobennan riba caya sin nada di haci ta busca otro cos di haci cu hopi biaha ta termina ta un problema pa nan mes, famia y sociedad. Cuminsando pa acceso na Enseñansa, proteccion, cuido di calidad, acceso pa programanan despues di orario di scol, no cu e lista di espera ta bira 2 aña pa ora bo yega na beurt, casi cu no mester mas.

Di edad crucial di 1 pa 5 aña muchanan mester di hopi nutricion, cuminda cu ta aporta na nutritientenan y vitamina, manera cu costo di bida a subi na Aruba cu 18% pa alimentacion, fruta y berdura a bira un luho pa famianan na Aruba. Mester sigui busca un solucion pa trece fruta y berdura di calidad y prijs razonable pa Aruba. No mester bagatalisa e importancia di nutricion pa comunidad, e aspecto preventivo di asina hopi malesa. Si introduci un sugar tax ainda e productonan aki ta keda mas barata cu fruta, berdura y proteina pues mas lihe lo mester recuri na nan.

Si muchanan mester biba den un cas cu tin hopi discordia pa motibo cu mayornan mester traha y tin hopi violencia domestico y no tin pas na cas y tin influencia grandi ariba nan bienestar psycho-emocional, scolnan mester ta e lugar cu ta brinda nan e seguridad, guia y apoyo cu nan mester. Trahador nan social na scolnan, segun e raportahe di gastonan nan fondonan ta disponibel ainda practicamente intacto, esaki no por.

Hopi di e proyecto of fundacionnan cu ta den e Sociaal Crisis Plan no ta nobo, tur tabata cay bao di un departamento di gobierno y tabata haya fondonan. Awor tin mas rekisito pa yega na e fondonan y por conclui cu e ta bayendo den un ‘slow pace’ y lo mester averigua wak ta con por acelera e proceso pa no perde e meta final for di bista.

Crèchenan mester un inspector, tin fondo disponibel pa Bureau Leerplicht, Traimerdia mester continua y mester conoce ampliacion. Nos Atardi cu ta un programa despues di scol pa alumnonan di scolnan secundario tambe tin necesidad pa continuacion y ampliacion.

E inversion den nos mucha y hobennan ta uno valioso no ban perde e oportunidad di tin e fondonan disponibel y pa e no yega su destinacion. Tin suficiente departamento y experto cu sa con pa pone e fondonan aki na bon uzo y lo mester evalua si e forma cu ta presentando nan ta efectivo y sostenible pa den futuro cu ta un pregunta legitimo cu den e mesun raportahe di e plan ta menciona, Arends-Reyes a subraya.

 

 

- Advertisement -

DUNA COMENTARIO

Please enter your comment!
Please enter your name here