Home Salud Cancer di prostaat ta e causa number 6 di morto cerca hende...

Cancer di prostaat ta e causa number 6 di morto cerca hende homber

331
0
SHARE
- Advertisement -

Cu un average di 13 morto pa aña

ORANJESTAD (AAN):  Fundacion Contra Cancer di Prostaat y Departamento di Salud (DVG) conhuntamente a lanza un campaña pa concientiza comunidad ariba e importancia di haci test di sanger tempran.

Cancer di prostaat ta den e top 3 di cancer na Aruba despues di cancer di pecho y cancer di cuero.

Relaciona cu e campaña aki, Jurette Croes, Vocero di DVG a expresa cu nan deber cu concientiza comunidad ariba factornan di risico y malesanan cu ta afecta nan salud y con pa preveni esaki.

Un di e malesanan sigur ta cancer di prostaat y esaki ta un cancer cu tin cu bay atencion na dje.

Cifranan cu por a saca afo di nan Servicio di Epidemiologia ta indica cu na Aruba 138 persona ta muri pa aña pa un of otro tipo di cancer. Pa loke ta cancer di prostaat, por bisa cu esaki ta e causa number 6 di morto cerca hende homber, cu un average di 13 morto pa aña.

Pesey pa DVG ta hopi importante sostene e campaña aki y pa hiba e mensahe pa comunidad. A enfatiza cu no tin motibo mas pa e topico aki keda un tabu den comunidad y pa e hende hombernan bay haci test.

“Cu un simple test bo por detecta e cancer aki na tempo. Esey ta loke e campaña aki ta enfoca ariba dje, pa e hende homber pero tambe su partner encurasha nan pareha of nan yiunan pa cuminza test tempran y no warda te ora cu ta laat of te ora cu cuminsa sinti sintomanan pa e ora bay haci algo a esaki”, Croes a remarca.

Banda di esaki, Lilly Presidente di Prince di Koningin Wilhelmina Fonds, a laga sa cu nan tambe ta sostene e campaña aki di Fundacion Contra Cancer di Prostaat.

El a bisa cu e campaña aki ta concientiza cada cabayero den e comunidad aki. “Tanten cu no a bati na bo porta, bo no ta hacie’e caso y e ora ey ta mihor pa bo ta na tempo pasobra tur sorto di cancer cu ta cay bao di Wilhelmina Fonds nos ta stresa ariba dje cu bo mester ta na tempo”.

Sra. Princes a laga sa cu Wilhelmina Fonds ta duna sosten ora un persona ta confrontando e malesa. Den caso cu un persona cu cancer tin cu bay afo y e prome acompañante tin cu bin bek Aruba pa traha Wilhelmina Fonds ta paga e di dos pasashi. Tur loke Wilhelmina Fonds ta haci ta gratuito, esaki cu sosten di e comunidad, a laga sa.

E representante di e compania Freeway Creative Agency, Johan Stopples, a splica cu pa loke ta e campaña nan a purba di busca un manera pa e mensahe yega na tur e hende hombernan y no solamente esnan 40 plus.

“E awareness ta pa e hombernan mas jong ainda pasobra nan tin miedo y nan ta pensa cu nan tin cu bay haci algo incomodo cu nan. E no ta asina mas. Ta djis un test di sanger por scapa bo bida”.

Nan a pone enfasis ariba esey y por wak un campaña unda ta wak hende hombernan di e comunidad haciendo algo den nan bida diario. Nan ta bin cu e mensahe pa tur hende homber “Test bo sanger. Sigui disfruta di bida”.

E campaña ta andando caba y lo dura tres luna. E ta ariba medionan di comunicacion y ariba rednan social.

- Advertisement -

DUNA COMENTARIO

Please enter your comment!
Please enter your name here