ORANJESTAD (AAN): E siman aki, Conseho di Ministronan a haya un presentacion di Departamento di Estadistica CBS riba Censo 2020.
Di 3 pa 13 di oktober CBS lo haci un prueba den cual lo acerca algun hogar pa asina haci un Censo piloto pa sigura cu tur cos ta funciona debidamente y Censo 2020 por ta exitoso.
E meta di e censo ta pa nos por haya informacion di cuanto nos ta, ken nos ta y con nos ta biba na Aruba.
Full digital y lo midi sostenibilidad:
Pa promer biaha e Censo lo worde haci completamente digital danki na Setar NV cu a yuda cu e tablets necesario pa haci e encuesta. Tur informacion lo worde monitoria y procesa den tempo real.
Censo 2020 lo tene cuenta tambe cu tur e metanan di sostenibilidad di Nacionnan Uni cu relata na e persona y su hogar. Ta trata aki di metanan nr 1 te cu 11, menos nr 2. Di e manera aki nos por haya un bista tambe con duradero Aruba ta desaroyando su mes.
Ban coopera pa un Censo 2020 exitoso:
Pa Censo 2020 por ta exitoso e participacion di Pueblo ta importante. Pesey e apelacion ta pa nos tur por coopera na momento cu nos worde acerca pa encuestadornan y brinda nan e informacion necesario.
E encuesta ta tuma mei ora y lo worde haci pa encuestadornan debidamente prepara pa e trabao. E cooperacion di nos tur ta importante, pasobra Aruba ta conta riba bo.
