Home Hudicial Chauffeur homber cu a ocasiona accidente fatal na 2016 a haya castigo...

Chauffeur homber cu a ocasiona accidente fatal na 2016 a haya castigo di trabou pa comunidad

394
0
SHARE
- Advertisement -

ORANJESTAD (AAN) – E homber Colombiano J.Z., biba na Aruba, a scucha Hues duna un castigo mas abao cu e exigencia di Fiscal. E pareha di e victima homber Ramirez Santana tabata sinta den sala di Corte cu wowo na awa ta scucha e caso.

El a haci un demanda di daño pero esaki a keda rechaza pa Corte pasobra e demanda no tabata suficiente splica pa mustra kico realmente tabata e daño. E daño mas pisa pa e señora cu el a perde su ser pareha y a keda su so cu nan yiu.

   ACUSACION:

Fiscal a bisa Hues cu ta acusa J.Z. cu 11 October 2016 algo prome cu 6:00 am, a causa un accidente di trafico riba e cruzada di Pos Abao y Caya Musica, y cu e hoben Roney Ramirez Santana di 19 aña di edad a fayece y e otro persona a resulta severamente herida. E pareha di defunto Ramirez Santana hunto cu su mama tabata presente. Segun Fiscal, J.Z. no a duna preferencia. Ademas e Isuzu D-Max Pickup su glasnan tabata getint cu no ta permiti pa mira bon riba caminda e mainta trempan ey.

   ACCIDENTE FATAL:

Hues a puntra J.Z. kico a pasa. El a pidi sorry pa loke a pasa. Segun J.Z. el a yega e cruzada cu su Isuzu Pickup y a para. El a mira cada banda y no a mira auto y a subi e caminda. El a para riba cu e no a mira ningun auto ta biniendo ora el a subi caminda. Diripiente el a sinti un scooter dal contra dje. Ta asina cu e victima y amigo Casuela tabata riba brommer y a dal contra Pickup color blanco cu number A-47089 di J.Z.

Hues a bisa cu Ramirez-Santana a fayece di biaha. Ambos no tabatin un helm bisti. Hues a bisa cu for di investigacion por mira cu di biaha cu e scooter a dal, J.Z. a para su Pickup. Esey ta mustra cu loke J.Z. ta bisa ta cuadra cu e berdad. Hues a remarca cu e glas tabata getint hopi scur.

Hues a bisa Fiscal cu el a ripara cu na Aruba tin hopi auto ta core rond cu glasnan hopi scur y si Polis ta haci algo riba esaki. Fiscal a bisa Hues cu ta haciendo e estudio pa introduci ley contra esaki.

J.Z. a bisa Hues cu e tin 20 aña ta core auto y nunca el a haya accidente. E ta haya cu loke a pasa ta traumatico. Hues a puntr’e si e ta traha. El a bisa cu e ta coy trabaonan y pa luna e lo sera entre 1.500 y 2.000 florin.

    EXIGENCIA DI FISCAL:

Fiscal a bisa Hues cu dia 11 October 2016 a sosode un accidente entre e Isuzu Pickup y un scooter. Door di e sla duro, a kita bida di un persona mientras cu e otro persona a keda seriamente herida y a keda basta luna hospitaliza. E persona aki a keda 2 aña sin por traha y a bay atras. E no a keda bon mas. Fiscal a bisa cu e mester a pensa si aki por papia di culpa di morto.

Fiscal ta haya J.Z. culpable di door di su culpa a causa cu Ramirez Santana a muri. E no a duna preferencia y a core den pick up cu glasnan getint.  E accidente a sosode 6 ‘or di atardi y tabata scur. J.Z. a bisa cu el a para y mira na tur dos banda y despues a core subi e cruzada. Investigacion di DTI ta mustra cu e glas getint tabata hopi scur. Fiscal a bisa cu e ta tene cuenta cu ta un caso bieu y cu ta promer biaha cu J.Z. ta cay den man di husticia. El a exigi 240 ora di trabou pa comunidad y si J.Z. no cumpli e lo mester bay 120 dia sera.

    ABOGADO:

Mr. Carlo promer cu a cuminsa defensa a bisa e famia di e victima cu ta un caso fastioso y cu mester compronde cu e tin cu haci su trabou di abogado y esaki por ta fastioso. E abogado ta haya cu mester declara Fiscal no admisibel. Tambe cu mester declara J.Z. liber.

  1. Carlo ta haya cu a viola e proceso di bon husticia. El a mustra cu despues di mas cu 2 aña, Fiscal ta bay persigui J.Z.. Nunca Fiscal of Polis a bis’e cu lo bay tin un caso penal contra dje. El a kere cu nada mas lo pasa. E abogado ta haya cu e interes di su cliente ta pisa mas cu e interes di Fiscal pa bin cu e caso penal. E ta haya cu tin duda kico realmente a pasa.

El a mustra cu DTI ta bisa cu e pick up no ta cumpli cu exigencia di claridad. E abogado a remarca cu DTI ningun caminda ta bisa cu e glasnan getint no ta laga mira bon riba caminda. Abogado mr. Carlo ta  haya cu e investigacion no ta suficiente. El a bisa Hues cu door cu tin dos cruzada net serca di otro, no por bisa cu J.Z. no a duna preferencia. Por bien ta cu e scooter a yega riba e cruzada for di un otro direccion. El a mustra cu e chauffeur di e scooter no tin rijbewijs y nan no tabatin helm bisti. E abogado a caba bisando Hues cu e ta haya cu mester declara J.Z. liber.

   SENTENCIA:

Hues a sera tratamento di e caso y a dicta sentencia di biaha. Huez a rechaza defensa pa declara Fiscal no admisibel. Hues a bisa cu e ta tene cuenta cu e caso ta bieu. Hues ta haya cu J.Z. no a duna preferencia y door di esey e scooter a dal contra dje. Ta door di J.Z. su culpa e accidente a sosode.

Hues a splica cu segun ley penal, den Corte mester demostra cu e sospechoso su culpa ta serio. E hecho cu no a duna preferencia, no por bisa cu aki ta trata di un culpa serio. E hecho cu un hende a fayece no por bay mira na consecuencia di e accidente sino e comportacion di J.Z.     Hues a mustra cu J.Z. a para y mira cu no ta bin auto y despues a subi e caminda.

Hues a bisa cu e no ta comparti punto di bisti di Fiscal cu J.Z. no por a mira nada door cu e glasnan cu tabata hopi scur. Huez ta haya cu no por bisa cu J.Z. no tabata pone hopi bon atencion. Pesey no ta haya J.Z. culpable di e promer acusacion esta morto door di culpa. Hues a sigui bisa cu e ta haya J.Z. culpable di a subi caminda sin duna preferencia.

Hues a bisa cu ningun castigo lo ta suficiente pa kita e tristeza cu e famianan a sufri. El a tene cuenta cu hopi tempo a pasa promer cu e caso a bin dilanti y a condena J.Z. na 80 ora di trabao pa comunidad.

Ta asina cu e dama a exigi en total 50 mil florin di daño cu ta parti den placa pa school pa e yiu, daño emocional. Fiscal a bisa cu a base di e documento cu e dama a duna, no tin suficiente argumento y ta pidi pa rechaza esaki. El a bisa cu e dama lo por cuminsa un caso civil.  Hues tambe ta comparti e punto di bista aki.

 

- Advertisement -

DUNA COMENTARIO

Please enter your comment!
Please enter your name here