Home Parlamento Con serio Robert Candelaria ta pa declara cu AVP ta e salbacion...

Con serio Robert Candelaria ta pa declara cu AVP ta e salbacion di Aruba

301
0
SHARE
- Advertisement -

Edgard Vrolijk di MEP:

ORANJESTAD (AAN): Segun Edgard Vrolijk di Partido MEP, el a tuma nota di un articulo di parlamentario pa fraccion di AVP, Robert Candelaria y mi no por ni imagina mi mes cu ta den serio su persona por tin e articulo aki y principalmente e titulo: “Partido AVP un biaha mas den pleno preparacion pa bolbe salba Aruba”.

Si ta den serio sr. Candelaria tin esaki anto e hunto cu su partido a perde tur nocion di realidad faltando respet pa pueblo den su totalidad. Ta kico Robert Candelaria ta insinua cu e titulo y e articulo sin pia ni cabes aki? Robert Candelaria ta kere cu – segun su persona – e pueblo aki no tin suficiente educacion, anto e por keda manipula nan ki ora cu e kier?

Con por salba e pais si ta AVP mes a lagu’e na werki?  Segun Vrolijk, tin di recorda Robert Candelaria cu na 2009 partido AVP y nan lider yoron Mike Eman a gaña pueblo cu cos ta malo financieramente pa Aruba y cu su persona manera cu e yega lo elimina BBO y lo elimina tur huur y alavez lo percura pa pueblo no conoce e fenomeno di Friends and Family mas y lo haci gobierno y tur compania estatal MEP-PROOF.

Un Aruba cu na 2009 tabata conoce un debe na 43% di nos GDP y sigur den caha a laga 250 miyon di Plant NV, 280 miyon di BBO Valero, 190 miyon di FDA, 200 miyon di BBO local (den total mas di 900 miyon Florin!) y unda cu Mike Eman y partido AVP a manipula mente di hende danki na ayudo di prensa comprometi, a convence pueblo cu cos tabata malo y a probecha pa por a malusa e entradanan laga atras pa e grupo di sponsornan y Friends and family and extra’s.

Mientras cu na 2009 cosnan tabata canando bon, e pueblo tabatin un poder di compra grandi compara cu awor. Mientras tanto AVP y Mike Eman a sigui un patronchi pio unda cu a percura pa emplea hendenan pa loco, a inventa tur sorto di fiesta, a percura pa e Friends and Family and extra’s raspa pueblo, entre nan Richard Arends, a para huur di hendenan segun su persona di MEP, pero a percura pa aumenta gastonan na huur na sponsornan y amigonan y familiarnan. Sin ningun consenshi Mike Eman tabata grita cu boca grandi: “Mi ta orguyoso di e debe cu mi a crea y cu awo pueblo tin di bay paga” y a  percura pa endeuda nos pais unda cu den poco tempo nos debe a aumenta y nos a yega un record di 90% di nos GDP na debe den 8 aña di gobernacion di Mike Eman.

Unda cu di 2010 nos deficit tabata 188.6 miyon, 2011: 325.2 miyon, 2012: 443.3 miyon, 2013: 332.8 miyon, 2014: 405.8 miyon, 2015: 184.6 miyon, 2016: 177.3 miyon y 2017: 137.3 miyon Florin.

No a sigui recomendacion di CAft:

Mike Eman y AVP a sigui cu nan fechorianan y Hulanda hunto cu CAft e tempo ey tabatin e poder pa por a para Mike Eman, pero nan a opta pa  lagu’e sigui bay y sigui endeuda e pais aki pa awo pueblo di Aruba desde 2018, 2019 y 2020 lo mester cuminsa paga su proyectonan PPP sin miedo cu partido AVP y Mike Eman a laga atras.

E periodo di 2009 pa 2017 nos no a tende sindicatonan ni gremionan ni pueblo asina critico manera nan ta awor. Mar’e cu tur por tabata mesun critico, anto Aruba no lo ta unda cu e ta actualmente.

Pensionadonan a ser kita di nan beneficionan y ambtenaarnan a ser masacra cu e middelloonregeling cu bendicion di sindicatonan cu a tuma tur cos asina calmo. Awendia nan ta topa e realidad ora nan bay cu pensioen y sigur ta culpa e gobierno aki cu practicamente ta man mara cu e debenan crea pa gobierno di AVP den 8 aña, unda cu pa 2039 nos lo ta na 50% di nos GDP na debe. Pues lo dura nos di awo en adelante 20 aña pa por yega ey.

Danki na Mike Eman su 8 aña di mal gobernacion nos a bay 30 aña atras. Un ehempel cu a laga atras ta  Green Corridor 292 miyon Florin pa paga den 18 aña, Watty Vos Boulevard 420 miyon Florin den 20 aña, Hospital 653 miyon den 29 aña, MFA 78 miyon den 25 aña.

Pues un total na debe di 1.443 miyon Florin pa pueblo paga unda cu pa 2020 gobierno tin di percura pa 80.7 miyon di saco di pueblo pa por paga esaki, pasobra ningun dia a laga algo presupuesta pa por cubri esakinan, pero manera Mike Eman a bisa: “a yega ora pa pueblo bay paga” y esey ta di lamenta pasobra e mes a bay drumi dushi den su penthouse y awo abo ciudadano ta esun cu tin di paga pa Mike Eman por a enrikece su kring di amigo y sponsornan.

Robert Candelaria si sa e formula pa yuda su mes:

Kisas Robert Candelaria ta loco pa AVP bolbe back pa e por caba di regla su mes, pasobra e por a regla si di un ser hopi cerca di dje, pero di dje net na mal momento a bin cambio di gobierno.

Candelaria a regla pa su mes cu hasta – maske e no tabata traha mas den gobierno –  gobierno di Mike Eman por a paga su ‘biahenan di trabao’ pa e por a bin negocia su number riba lista di AVP pa eleccion 2017. Y sigur a la formula di Richard Arends, Robert Candelaria a fix su mes un contracto di 7.835 Florin pa luna como coordinador y cu pueblo a paga pa e por a core campaña, esaki tambe autorisa door di ex Minister Mike de Meza.

Sigur placa di pagador di belasting a percura pa e ta den parlamento y awo e placa ey ta parti di nos debe acumula cu pueblo tin di paga. Alavez abo homber y muher trahado tin di paga su salario como parlamentario. Ta con mas bo ta kere cu pueblo por kere cu abo y AVP ta salbacion di Aruba? Ta coy hari, pasobra banda di e super salario riba custia di e pagador di belasting, Robert Candelaria a fix su mes pa sin ningun openbare sollicitatie bira director di Directie Scheepvaart (a-la-Richard Arends) cu un salario maximo cu ta yega den careda di 16.000 Florin pa luna.

Danki cu a bin cambio di Gobernacion si no awe nos lo tabatin su persona como director y alavez Richard Arends como director financiero den RDA y sigur Mike Eman a percura pa tur departamento tin un aliado di AVP na cabes, manera ta e caso actual y cu ta strobando hopi proceso den e gobernacion aki.

Pa termina mi ta bolbe ripiti: Ta kico Candelaria ta kere cu e por keda manipula pueblo pa e por tin probecho personal? Y sigur tur locual pueblo ta pasando aden ta nada otro e consecuencia di e mal maneho financiero di AVP y cu nos tur ta mara cu nos kier of no te 2039 unda cu pueblo porfin lo por conoce un alivio  financiero.

- Advertisement -

DUNA COMENTARIO

Please enter your comment!
Please enter your name here