Ministro Schwengle tabata e gran abogado di sugar tax na 2016
*Sugar Tax tabata parti di e programa pa eleccion 2017 di AVP
ORANJESTAD(AAN)–Un situacion sumamente serio ta wordo crea na Aruba cu informacionnan cu no ta cuadra den mundo politico.
Un di e discusionnan grandi cu hasta por bay afecta empleo di trahadonan, ta e asunto di Sugar Tax cu segun a wordo treci dilanti awor lo bay afecta e mercado di refresco na Aruba.
Ayera informantenan di DIARIO a revisa e pakete di medidanan cu for di 2014 ta na discusion na Aruba, cu manera na hopi ocasion DIARIO a splica a bira victima di e forma con a baha entrada di e pais cu reduccion di BBO, a gasta placa sin midi cu entre otro e proyectonan di “Bo Aruba” y finalmente a introduci Citgo cu a causa e desastre economico cu Aruba conoce.
Den e pakete di medidanan di 2014, Conseho Social Economico den cual Camara di Comercio y Sindicatonan ta representa, a presenta Sugar Tax como un forma directo pa aumenta entrada di Aruba.
Den e pakete aki ta wordo mustra riba e problemanan cu Sugar Tax tambe lo evita pa salu di hende.
Den e proposicionnan aki tambe a papia di accijns mas halto pa bebida alcoholico.
Sugar Tax a wordo carga dor di Ministro Alex Schwengle cu durante tratamento dor di Parlamento na 2016 a trece dilanti cu Sugar Tax lo yuda den prevencion di malesanan cu uzo di sucu ta causa.
E splicacion aki tambe ta presente den e programa di accion di AVP pa campaña electoral 2017.
“No por ta cu actualmente Sugar Tax ta wordo uza pa crea un ambiente politico na Aruba caminda te awor ningun decision a cay,” a wordo mustra na DIARIO.
Ta di lamenta loke ta pasa actualmente den mundo politico cu mester haya un solucion pa paga e debe enorme cu a hinca Aruba den estado di bancarota.
