Ariana Cuevas ta e “Deaf Person of the Year” di Quota Club
ORANJESTAD (AAN): Durante e apertura di Siman di Kibra Silencio di Quota Club, Service Director Kristie van Nes a duna di conoce cu e meta di e siman aki no ta solamente pa haci test di oido. E mensahe cu nan kier duna comunidad ta hopi mas amplio.
Pesey el a enfoca un rato ariba e parti di prevencion pasobra esey ta un parti cu Quota ta purba cubri tur aña.
Na Aruba tur caminda cu bay tin sonidonan duro. Aworaki ta drentando fin di aña. Ta bay tira clapchi, ta bay wak pagara. Despues carnaval ta cuminza. Constantemente durante henter aña ta confronta sonidonan duro.
Locual por haci ta cu si bo sa cu ta bay tin sonido duro, no lubida bo earplugs. Esakinan ta yuda proteha bo oido. E ta baha e volume cu tin sigur cu 20 – 25 decibel. No para mucho cerca di un speaker vooral den temporada di carnaval, a remarca.
Hopi hende ta lanta mainta cu un ‘pip’ den nan orea y esaki ya caba ta un indicacion cu algo a bay fout mientras cu tabata tin e sonidonan duro.
Quota ta kere cu educacion ta e base di e concientizacion y pesey nan ta haci bishitanan na scol. E siman aki nan ta enfoca mas ariba e hendenan grandi pa test nan oido pa wak si tin un problema, pero tambe pa educa nan y nan famia, Van Nes a indica.
Manera tur aña, Quota Club ta scoge nan persona sordo di aña, cual ta un persona cu nan ta admira cu apesar di ta un hende cu ta sordo toch ta exitoso pasobra nan tambe por y tambe nan mesun bon cu hopi hende den comunidad.
E aña aki a scoge no a scoge pa un persona adulto pero a scoge un hoben. Un mucha muher di 15 aña cu a nace sordo y ainda ta sordo, pero a haya un aparato special tempo cu el a haci 7 aña y asina el a cuminza scucha.
Apesar cu el a nace sordo, el a cuminza cu e proceso di siña papia. Awo na Scol Scucha nos el a haya si base di educacion y awe e ta bayendo EPB exitosamente. Ta trata di e mucha muher Ariana Cuevas, ken a ricibi e award hunto cu su mayornan na FEPO.
