Home Politica Cu Sugar Tax e victima ta wordo castiga un biaha mas

Cu Sugar Tax e victima ta wordo castiga un biaha mas

77
0
SHARE
- Advertisement -

Giovanni Arendsz di AVP:

ORANJESTAD (AAN): Segun Giovanni Arendsz di Partido AVP, e momento a yega pa Gobernantenan tin di stop di pretende cu e problema di salud por worde soluciona cu un Sugar Tax.

E mensahe cu nos ta scucha ta cu un Sugar Tax ta forsa a comunidad scohe pa opcionnan mas saludabe y ta yuda reduci malesanan cronico.

E ta un berdad cu tin un link directo entre consumo di sucu y malesanan cronico. Pero tambe ta un berdad cu e parti mas grandi di sociedad cu ta worde afecta pa malesanan cronico ta esnan di menos recurso y esnan cu e entrada mas chikito den comunidad.

Sugar Tax a worde introduci na diferente pais desde 2014. For di Mexico te na Inglatera. Segun e instituto Technologico di Mexico (ITAM) despues di 4 aña cu a introduci e sugar tax na Mexico ariba refresco,  e resultado ta cu e no a logra su meta.

Na prome instante e consumidor a reacciona ariba e subida di prijs y e consumo di refresco a baha durante un periodo cortico. Awe 4 aña despues e consumo a bolbe subi back y ta actualmente caminda e tabata prome cu a introduci e sugar tax na 2014. Ademas di esaki, durante e tempo cu e sugar tax a baha e consumo di refresco, toch e no tabata efectivo pa reduci obesidad of malesanan cronico .

Segun e estudio di COLMEX no tin niun evidencia cu un sugar tax ta efectivo pa trece cambio den e consumo di sucu di e consumidor. Especialmente no tin cambio den e consumo di esnan cu entrada mas chikito cu ta e grupo di consumidor mas grandi. Sinembargo e posicion economico di e grupo aki si a worde afecta di un manera devastador.

Medidanan ariba consumo semper ta pisa y dal esnan mas pober den un comunidad mas duro. E famianan cu entrada minimo  ta entregando  mensualmente entre 25-30% di nan entrada  caba na caha di gobierno pagando pa tur belastingnan actual. Un famia cu un entrada modera ta entrega entre 10-15% di nan entrada na caha di gobierno. Si haci un comparacion, e parti di e salario cu e famia cu entrada minimo ta entrega na caha di gobierno tur luna ta 50 % mas cu e parti cu e famia cu di entrada modera ta entrega na caha di gobierno tur luna.

E sugar tax cu Aruba ta pensa di introduci lo tin probablemente mes un efecto cu e tabata tin nan Mexico y na otro parti di mundo. E sugar tax lo ta un manera di schuif e responsabilidad di e malesanan cronico ariba e victima, castiga esaki un poco mas y haci e peso grandi caba cu  esnan mas vulnerable den comunidad  ta carga mas pisa ainda.

E conclusion no por ta otro cu un sugar tax lo ta solamente un set di medida pa trece mas placa den caha di gobierno. E no lo yuda cu problemanan di malesa cronico y tampoco e lo ta ta beneficio di salud general.

Sabiendo esaki, e lo ta inaceptabel pa acepta cu ta sigui cu e idea di un sugar tax.

- Advertisement -

DUNA COMENTARIO

Please enter your comment!
Please enter your name here