Gino Goeloe ta recomenda mayornan:
ORANJESTAD (AAN): Tur scol, y tambe Traimerdia ta tene cuenta, cu e dianan aki, cu tin un calor sofocante, e alumnonan no por bay haci gym, of bay hunga pa 11 or of 12 or di merdia of entre 1 or y 4 or atardi, den e higra di solo aki, pero esaki tambe ta algo cu mayornan mester tene cuenta cune, y sr. Gino Goeloe ta elabora riba e tema aki.
Den entrevista cu DIARIO, e director di Wit Gele Kruis, sr. Gino Goeloe, a referi na e asunto aki y a splica cu awor na scolnan tin specialistanan den e ramo di movecion y salud y cu nan ta wordo educa tambe y sa ki ora e alumnonan por haci ehercicio y ki ora no.
Goeloe ta na altura cu na Instituto Pedagogico Arubano (IPA) tin un bon opleiding di Movecion y Salud, y Wit Gele Kruis sigur ta apoya, cu tur scol mester tin docente cu ta guia muchanan y cu nan no ta solamente den e rama di movecion pero tambe alimentacion.
Nan ta educa e muchanan ya caba di eerste y tweede klas te 6de klas kico mester come, kico no, pa bebe hopi likido y laga bebe hopi refresco un banda mescos cumindanan vet, y tambe cu hopi sucu. Riba esaki ya caba nan ta wordo educa, y esaki ta hopi bon. Goeloe ta na haltura tambe cu den scolnan nan ta percura pa e muchanan no bay haci gym den higra di solo.
Tambe e muchanan cu ta bay despues di scol Traimerdia, e centronan aki ta bon structura y e muchanan ta haya begeleiding y ta haci nan huiswerk y no ta bay hunga den e higra di solo.
Pero tin muchanan cu despues di scol ta bay cas come, y e ta pidi mayornan pa por fabor, entre 1 or y 4 or di atardi laga e muchanan paden di cas, y despues di 4 or nan por bay hunga pafo, of bay futbol, baseball of cualkier deporte, cu tambe ta bon pa nan haci.
Sr. Goeloe ta reitera cu e muchanan mester bebe hopi likido, vooral awa y no juice y refresconan cu hopi sucu. Muchanan ta gusta sucu y e ta di compronde, pero miho basha mitad juice mitad awa.
Tambe por corta pida di apelsina of apple tira nan den awa y e ta cambia su smak ya cu hopi hende no gusta bebe awa, pero haci esaki ta duna un smak dushi natural y bon pa salud.
