Home Editorial Despues di 22 aña un gran politico ta despedi di politica activo 

Despues di 22 aña un gran politico ta despedi di politica activo 

543
0
SHARE
- Advertisement -

Diamars DIARIO a bin cu e primicia cu Otmar Oduber ta retira for di politica y algun ora despues, e mes acompaña pa Prome Minister, coleganan minister, parlamentarionan di POR y su staff a haci e anuncio oficial.

Manera e Matutino di Aruba DIARIO a anuncia, su retiro ta debi na factornan familiar y personal, cual nos ta compronde y acepta, pero no por laga afo cu Aruba lo perde un gran politico, un gran lider y un gran estadista cu a lo largo di su carera a logra metanan grandi pa desaroyo di nos isla.

For di momento cu el a bira politico, por a mira y sinti e potencial den Otmar, no tabatin duda cu el a logra hopi cos pa Aruba. Loke mas a resalta den dje tabata y ta sigui ta su dedicacion, su  perseverancia, e deseo pa mehora y especialmente su amor pa su isla y deseonan grandi pa logra cosnan grandi pa nos pueblo.

Den e diferente posicionnan cu el a eherce prome cu el a asumi e reto di ta representante di pueblo den Parlamento, el a enfoca na bay e ‘extra mile’ pa logra e resultadonan positivo, y na 2001 ora el a bira parlamentario, su trabaonan a bira mas publico.  Na 2009 ora el a asumi e posicion di minister, su enfoke a bay totalmente na logra metanan cu hopi a pensa lo ta inalcansabel, pero awe nos tur por mira y disfruta di nan.

Semper dispuesto pa papia cu su hendenan, scucha nan preocupacionnan y traha na bienestar di Aruba. Su manera di traha, su pasion pa su trabao y pa su isla, su dedicacion na su trabao, su profesionalismo, su perseverancia y su don di hende a lague bira un di e politiconan mas stima na Aruba. Logicamente e mesun cualidadnan aki a conduci cu hopi no tabata guste, hopi a purba kibre, pero nunca a logra, al contrario, nan a hacie mas fuerte.

No tin duda cu Aruba a conoce hopi logro bou maneho di Otmar Oduber, pero esun di mas grandi te na e momentonan aki ta haci Departamento di Turismo, ATA, Aruba Tourism Authority un entidad Sui Generis independiente di gobierno. Pa añanan largo ta diferente gobierno y minister a purba di logra e paso aki, pero sin exito, pero e perseverancia di Otmar Oduber y su forma di ‘get things done’ a pone cu na 2011, apenas 2 aña despues di a bira Minister di Turismo, Aruba a conoce ATA SG y te awe nos por mira tur e beneficionan cu esaki a trece cune, siendo turismo nos pilar economico.

Siguiendo e logro di ATA SG di cerca ta e anuncio di un hotel na San Nicolas. Despues cu aña tras di aña y gobierno tras di gobierno a purba yega na un desaroyo diferente pa pariba di brug, finalmente Otmar a logra y dentro di poco San Nicolas lo mira inicio di construccion di un futuro nobo pa e parti pariba di nos isla.

Tambe e esfuerso pa logra finalmente un solucion sostenibel pa maneho di desperdicio y atencion pa nos medio ambiente mester worde menciona. Importancia di vivienda pa habitantenan di Aruba semper a ocupa un posicion halto den su agenda y mientras cu a atende e atraso cu tabatin den otorgamento di tereno erfpacht, tambe a habri e espacio pa traha mas vivienda social pa esnan den mas necesidad.

Esaki ta solamente algun di su logronan, pasobra ta masha hopi mes tin e stempel di logro di Otmar Oduber riba nan, tanto riba tereno di aviacion, labor, maritimo, sector primario, transporte, cultura y e atencion cu San Nicolas y pariba tabata sclama pe.

Ainda e tin 3 luna como minister, prome cu e inicia un etapa nobo den su bida, esey kiermen cu ainda tin 3 luna pa laga mas stempel di logro riba su nomber, y no lo ta nada straño cu esaki sosode.

Aruba henter guste of no, admire of envidie lo bay sinti su falta como politico y for di dia 12 di december politica na nos isla lo drenta un etapa diferente, unda un gran politico y persona no lo forma parti activamente di dje mas.
Danki Otmar y hopi exito den e etapa nobo di bo bida!

- Advertisement -

DUNA COMENTARIO

Please enter your comment!
Please enter your name here