Home General Di un encuentro na Cuba pa un centro Chavista na Aruba

Di un encuentro na Cuba pa un centro Chavista na Aruba

89
0
SHARE
- Advertisement -

Analisis

Ora na 2017 Nicolas a cera frontera, Asdrubal a bin habri centro Chavista

*Citgo y Aruba a uni mientras Obama tabata actua contra Chavismo 

Manera informacionnan den edicion di awe ta indica, un situacion sumamente peligroso y serio ta culmina den nos region pero tambe pa Aruba mes.

Medidanan ta wordo tuma enfrente un menasa serio cu directamente a wordo lansa dor di e dirigente di Asamblea Nacional Constituyente, Pedro Careño, cu a mustra cu Venezuela mester bin libera Aruba y Curaçao tambe di e poder di Merca.

Di e forma aki tambe Aruba ta haya prueba cu ora DIARIO tabata adverti pa e peliger serio cu e proyecto Citgo a crea pa Aruba, nos tabata tin rason.

Cu e proyecto Citgo Nicolas Maduro a haya un poder riba Aruba, cu tabata bay mas leu cu un poder economico.

Un potret di Mike Eman y Nicolas Maduro na Cuba a laga Aruba e tempo confundi.  E potret a wordo sigui pa mas potret den e relacion entre gobierno Mike Eman y e regimen di Nicolas Maduro.

Aruba no tabata realisa e peliger den cual el a wordo hinca. E medidanan di Merca a cuminsa for di 2014 y ta intercambio fuerte tabata tin entre e dos paisnan.

Si ya Hugo Chavez a uza petroleo pa haya sosten di e cadena mundial Comunista, Nicolas Maduro a uza Citgo pa e dal Merca ora el a entrega casi mita di Citgo na Rusia como borg. Te awe casi mita di Citgo ta como borg den man di Rusia.

Den un situacion mundial tenso, e negociacionnan di Citgo a tuma luga mientras e regimen di Nicolas Maduro tabata saca placa bruto for di Citgo, cu tabata sirbi pa laba placa entre otro crimennan.

Aruba no tabata consciente di e manipulacionnan cu a tuma luga mientras Aruba tabata baila. Hecho ta cu Nicolas Maduro a haya loke e tabata kier, cu ta economia di Aruba cu a wordo poni den su man pa medio di Citgo.

E bofon grandi cu a wordo haci di Aruba sin duda por wordo nota den e hecho, cu na 2018 Nicolas Maduro a cera fronteranan entre Aruba y otro islanan Hulandes y su frontera. Pero ta den e epoca aki tambe Asdrubal Chavez a proclama na Aruba cu e isla por a bira centro di Chavismo pa medio di Citgo.

Aruba como centro di Chavismo, tabata e ideal di Nicolas Maduro cu tabata crea su imperio den region di Caribe pa medio di petroleo.

Maduro tabata sa cu e no tabata tin placa pa paga e proyecto di Citgo. E medidanan di Merca y medidanan cu Union Europeo tambe a tuma, no a cay for di cielo diripiente.

Ora Aruba a firma e contracto cu Citgo, ya e relacion entre Venezuela y Merca tabata nulo.  Donald Trump no tabata e prome Presidente di Merca cu conflicto cu Venezuela cu awe ta den un situacion mundial cu ta rementa.

Nos a adverti na 2018 cu Aruba por bira parti di un scenario mundial peligroso. Nos no sa kende a drenta Aruba y ki poder scondi Venezuela por tin ainda na Aruba caminda Citgo a habri porta pa Maduro drenta.

Bofon a wordo haci di Aruba cu tabata busca solucion pa habri frontera ora Maduro a cera frontera na 2017 na momento cu Asdrubal cu Merca a core for di oficinanan di Citgo na Merca, a bin busca asilo.

Aruba na e momento aki ta den un situacion serio. Pueblo mester ta bon informa pasobra ta un conflicto internacional ta rementa den nos region cu menasa di Venezuela di bin “libera” Aruba.

Awe prueba ta wordo duna cu nada ta keda scondi. Lamentablemente ta un Aruba kibra pa un acuerdo cu Citgo mester biba cu un realidad amargo.

- Advertisement -

DUNA COMENTARIO

Please enter your comment!
Please enter your name here