Home Hudicial Diez aña di prison parti pa trio Venezolano cu a haci asalto...

Diez aña di prison parti pa trio Venezolano cu a haci asalto arma riba Waykiri Condos Aruba  

432
0
SHARE
- Advertisement -

ORANJESTAD (AAN): E hombernan Venezolano G.S.M., I.J.F. biba na Aruba y W.V.G. biba na Aruba 3 aña ilegal, a scucha Hues confirma e exigencia di Fiscal. Hues a condena I.J.F. y W.V.G. na 4 aña di prison mientras cu G.S.M. cu tabata e chofer na 2 aña  di prison.

Nan ta culpable di e asalto arma cu violencia cu a sosode dia 26 di Januari 2019 riba un compania di construccion cu ta haciendo trabaonan di e proyecto Waykiri Condos Aruba.

    ASALTO ARMA:

Hues a lesa raport di Polis cu ta mustra cu na un compania di construccion e doño A.C. a haci keho di asalto arma cu violencia. Den oranan di atardi el a cana bay oficina pa paga empleadonan.

Dos homber cara tapa a drenta e oficina y un a saca revolver dirigi riba A.C. su cabez. E otro a bisa: “Duna mi e placa”. El a bisa nan cu e no tabatin e placa y cu e placa tabata den di tres piso cerca un muher. Nan a bis’e pa drumi abao y un a dal’e un skop den cabez y e otro a pone arma na su cabez. Un a bisa pa tir’e. Nan a listra den su paña y a coy su cartera cu 800 Florin y den su paña a haya 1.500 Florin. Tambe a bay for di lachi di oficina cu 10 mil Florin. Nan a bay cu su holoshi di man.

    TRAHADOR A PLANEA ASALTO:

Polis a topa 30 trahador y entre nan un persona na sanger cu cap na cabez, kende ta A.C.. Testigonan a bisa cu nan a tuma number di e auto cu ta un Nissan March shinishi A-75559 tin e asaltantenan aden. Esey a haci cu Polis di biaha a busca y a topa e auto. A surgi un persecusion caminda e auto a bay dal contra muraya di cas. E ocupantenan a core bay.

Despues a haya G.S.M. (El Gocho) scondi den un cura di cas. A confisca e auto. A interoga G.S.M. y despues a logra detene I.J.F. y W.V.G. Un di e sospechosonan Carlos Perrozo (Toto), kende ta un trahador di e compania, ta esun cu a planea e asalto arma. El a worde deteni 4 Februari 2019 y 7 Februari 2019, el a mata su mes den cel na San Nicolas.

Esun cu a organiza e asalto a bisa cu el a traha plan y a acerca I.J.F. Un dia promer cu asalto I.J.F. hunto cu El Gocho y a bisa Toto cu kier haci asalto. Toto a splica nan ki dia lo ta haci e asalto. E dia tabata 26 Januari 2019.

El a bisa cu mester haci esaki riba A.C. Toto a bisa nan cu W.V.G. (Caracas) tambe kier haci asalto. A bay busca Caracas y den auto di El Gocho a bay na e proyecto y el a mustra unda e oficina di A.C. traha. Ta asina cu Caracas a keda cu e placa.

I.J.F. a bisa Hues cu Toto a yam’e y bis’e pa haci e asalto arma. El a splica cu nan cuater a bay un dia promer na e lugar y Toto a splica nan unda e oficina ta y mustra nan potret di e homber A.C.  Ta asina cu G.S.M. tabata e chofer di e auto. W.V.G. a confirma loke I.J.F. a bisa. Segun I.J.F. ta Toto a bin cu e plan y a mustra nan e lugar. I.J.F. y W.V.G. a baha haci e asalto arma y G.S.M. tabata esun chofer cu a keda den e auto. W.G.V. a bisa Hues cu el a coy 3 mil Florin y a laga atras e saco cu placa den e auto. Tambe el a bisa cu el a coy e holoshi di man.

El a bisa cu el a manda placa Colombia pa su yiu y a usa placa pa paga huur y a cumpra un cadena di oro pa no gasta e placa. I.L.F. a bisa cu el a coy A.C. su yabi di auto y su cartera. Segun I.L.F., ora nan a dal contra e cura di cas, el a benta e cartera afo y a core bay. Despues el a benta e yabi di auto afor. Ta asina cu e saco di placa, Polis no a haya. G.S.M. a bisa cu nan a bis’e cu e lo haya como taxi pirata mil Florin pa hiba nan na e oficina y despues hiba nan back.

   STRANHERO CORE TAXI PIRATA:

G.S.M. a bisa cu na Venezuela el a haya castigo pa mata. E ta ilegal na Aruba mas cu 1 aña. G.S.M. a bisa cu e auto e tabata huur for di un persona y tabata paga pa siman. Segun I.L.F. el a haci asalto arma pa asina su ruman muher por haci un operacion pa haya riñon na Venezuela. Hues a remarca cu esey no ta motibo.

    DEMANDA:

Representante di A.C. a presenta den Corte. El a bisa Hues cu A.C. a keda traumatisa y no kier presenta den Corte pasobra e tin miedo. El a manda carta caminda e ta demanda 13 mil Florin cu ta placa pa paga 30 trahador, 3 mil Florin pa su holoshi, cartera y cellula cu a bay cun’e.

Tambe e 13 mil Florin cu el a fia pa por paga e trahadornan. En total e daño material ta 29.250 Florin. Tambe el a exigi daño inmaterial cu ta 3 luna sin por traha y trauma cu el a haya tratamento p’e. En total e daño ta mas cu 60 mil Florin.

   EXIGENCIA DI FISCAL:

Fiscal a bisa cu promer a detene G.S.M. y despues di algun luna a detene e resto. Toto ta esun cu a traha e plan y a mata su mes den cel na warda di Polis, San Nicolas. G.S.M., I.J.F. y W.V.G ta esun cu a haci e asalto arma. G.S.M. tabata e chofer. Fiscal a haya cu nan ta complice di e asalto arma. El a exigi 4 aña di prison pa I.J.F. y W.V.G. y 2 aña pa G.S.M. cu tabata e chofer. Na opinion di Fiscal, e auto confisca lo por bay pa e doño for di kende G.S.M. tabata huur e auto.

Pa loke ta demanda di A.C., Fiscal ta haya cu mester paga 10.500 na salario di trahadornan. Fiscal ta  haya e demanda di 3 mil Florin mucho halto cu mester paga. Tambe e ta haya e demanda di 13 mil Florin cu a fia ta di mas. E daño inmaterial el a baha esaki na 5 mil Florin. El a bisa Hues cu e resto ta no admisibel. El a pidi Hues pa pone e medida di pago contra e sospechosonan.

   ABOGADO:

Abogado mr. Illes ta haya cu su cliente ta mas bien complice pasobra e tabata e chofer. Toto tabata esun cu a bin cu e plan. G.S.M. solamente mester a hiba nan na e lugar y hiba back. E ta haya exigencia di Fiscal na su lugar. Sinembargo e ta haya e demanda di victima no ta mucho cla. El a pidi pa declara e victima no admisibel y por haci un caso civil.

Abogado mr. Carlo a bisa Hues cu I.J.F. ta culpable pero a pidi Hues pa tene cuenta cu circumstancianan. El a bisa cu e no kier papia bon di loke I.J.F. a haci pero el a haci’e pasobra e kier a yuda su ruman muher cu mester operacion di riñon na Venezuela. Segun e abogado, I.J.F. lo kier dona un riñon na su ruman. E ta haya e castigo exigi pa Fiscal, 4 aña di prison, mucho halto. El a pidi castigo combina cu un periodo condicional hopi pisa. E abogado ta comparti punto di bista di su colega pa cu e demanda di daño.

Abogado mr. Kip di W.V.G. a bisa Hues cu Toto a bin cu plan y W.V.G. ta ultimo cu a worde yama pa forma parti. E no a menaza A.C. cu arma y tampoco no a dal. El a bay cu 3 mil Florin di e placa total di asalto arma. No tin prueba legal cuanto placa realmente a worde horta. E abogado a bisa Hues cu for di chikito W.V.G. tabata bin Aruba y tin famia aki. E tin un yiu malo y a acepta pa haci e asalto pa asina haya placa. E no ta bon pa papia y ta lamenta loke el a haci. El a coopera cu e investigacion. Segun e abogado W.V.G. su famia ta rabia cun’e pa loke el a haci. E abogado ta haya e castigo di 4 aña di prison hopi halto. Tambe a pidi pa declara no admisibel e demanda di daño di victima.

   SENTENCIA:

Hues a sera tratamento di e caso y a bisa cu e ta dicta sentencia di biaha. Hues ta haya cu tur tres ta envolvi complice di asalto arma cu violencia. Hues ta haya cu G.S.M. a yuda door di hiba nan. Hues a bisa cla y raspa” “No kier asalto arma na Aruba. Nos ta depende di turismo. Nos no kier hende bin di afor y bin haci asalto arma”.

Pa cu e castigo, Hues a bisa cu e ta tene cuenta cu maneho di Corte pa cu asalto arma. Pa asalto arma cu menaza ta 4 aña. Aki no ta solamente a menaza sino a dal e victima. Esaki ta castigo pa un hende so. Ora ta trata di mas hende, e castigo di 4 aña ta na su lugar pa I.J.F. y W.V.G.  Hues a condena G.S.M. na 2 aña di prison.

Hues a bisa cu e ta comparti punto di bista di abogadonan pa cu demanda di daño, no tin claridad y e no ta argumenta. Hues a bisa cu loke si por keda demostra cu tin 3 mil Florin y placa den cartera e 250 Florin pa traha rijbewijs y carchi AZV. Pa cu daño inmaterial el a haci esaki na 1500 Florin. Hues a declara e victima no admisibel pa resto, pero por cuminsa un caso civil.

- Advertisement -

DUNA COMENTARIO

Please enter your comment!
Please enter your name here