Ing. Marlon Croes, director di DOW:
ORANJESTAD (AAN) – Diaranzon mainta director di Departamento di Obranan Publico (DOW) Ing. Marlon Croes y e director di Departamento di Infrastructura y Planificacion (DIP) Ing. Haime Croes a yama un conferencia di prensa.
E tres puntonan cu nan tabata tin riba agenda ta construccion ilegal, Alto Vista y ROP (Ley di ordenamento teritorial).
Ing. Maron Croes a reitera locual a trece dilanti caba den un conferencia anterior, cu DOW y DIP a forma un alianza pa combati construccion ilegal, y nan hunto cu e controladornan di ambos instancia, ta visualiza y controla esaki pa asina tuma e medidanan necesario.
Director di DOW a señala cu ta depende di e indole di construccion ilegal, si ta trata di mal uso di tereno, mal uso di propiedad di gobierno, of si a traha algo ilegal mes.
Diaranzon mainta nan a para un construccion riba un area di Eagle Beach, unda un persona ta huur un kiosco di gobierno y haci construccion riba dje sin permiso di e doño cu ta DIP cu ta esun cu tin e maneho.
Ademas e persona aki tampoco tin permiso di construccion. Esaki despues cu e persona concerni a haya un lapso di dos siman pa e por legaliza esaki y combersa cu gobierno, pero e no a haci uso di dje, y Diaranzon mainta DOW y DIP a eherce nan trabao pa trek bek e construccion.
Ing. Marlon Croes a subraya cu tin un bon cooperacion entre tur dos instancia y nan lo sigui reforza esaki pa tur cos bay riba e linea corecto.
