Home General Director Croes mes ta responsable pa arma di candela perdi na Barcadera

Director Croes mes ta responsable pa arma di candela perdi na Barcadera

149
0
SHARE
- Advertisement -

Edward Maduro, lider di SADA:

ORANJESTAD (AAN) – Douaneronan ta drenta den accion awe Diaranzon na Aruba!  E ta un forma solidario y pa protesta riba e forma sospechoso cu esnan na mando, a bin ta atende un caso di un arma di candela perdi.

Director y Ministro di Douane ta sospecha cu e lider di Sindicato SADA por ta meti den e asunto di arma di candela perdi dia 19 di Juli 2019 na Waf di Barcadera.  Director aparentemente a dicidi esey, como cu e nomber di Edward Maduro (lider Sindical) ta poni riba Rooster pa traha e dia ey na Barcadera.

Pero e asunto aki a bons dal duro bek den cara di Director y den cara di Ministro.  Pasobra a resulta cu e Diabierna ey 19 di Juli 2019, ta henter dia e lider di SADA tabata reuni cu Gobierno na Oficina di Cocolishi na Playa.  E no tabatey mes na Barcadera.

Edward Maduro, lider sindical di SADA,  a señala cu e asunto di e arma cu falta, segun e wacht rapport di dia 19 di Juli, enberdad ta un asunto hopi dificil.

Maduro a expresa cu ora di asumi responsabilidad no mester tira falta riba di esnan cu cargo mas abao pero mester cuminza pa e cabes di Cuerpo di Aduana, sr. Croes.

E sindicalista a señala cu sr. Croes ta na haltura cu e armanan den e seccion di Waf no ta hinca den un “weapon kamer” cu ta un caminda sigur sino den un washok.

Eduard Maduro a subraya cu e sindicato a bringa pa arma e Cuerpo di Aduana na Barcadera, pasobra mester zorg e seguridad personal di nan coleganan na e manera mas safe posible, pa evita cualkier cos robes cu por pasa.

E oficina di Barcadera no por wordo gelock y e ta keda habri, practicamente pa 24 ora. Pues un supervisor cu ta traha cu poco personal, y hasta tin supervisor cu mester bay afo pa asisti su coleganan riba waf.

E lider sindical ta sigui splica cu nan a yega di bisa nan director cu e lugar ey no ta safe y cu ora e supervisor mester bay pafo pa haci control, of duna asistencia, mester zorg pa e lugar keda cera, di manera cu ningun hende por drenta.

Pero nada di esaki a sali afo. Mas cu dos aña nan ta bisando e director esaki pero nada ta cambia. No por ta asina cu armanan ta hinca den un washok, cu berdad ta cera, pero no den un weapon kamer manera mester ta, apesar cu tin un weapon kamer na Barcadera, pero e hefe encarga cu e oficina aki no ta sinta den e wapenkamer.

E sindicato a bise cu e supervisor mester ta den e oficina ey pa por tin 24 ora bista riba e weapon kamer aki. Pero asina mes e supervisor mester sali asisti su coleganan pasobra tin falta di persona formal den e oficina aki.

Y pa haci e situacion peor ainda e washok aki tin un yabi so, cu ta poni unda cu ken cu ta por tin acceso  na esaki. Esaki a wordo denuncia varios biaha na e hefe sr. Croes, y bisa e hefe di e seccion aki cu nan ta haciendo wega y dia cu algo pasa nan ta bay culpa e chikitonan, pero nan cu ta e promenan responsable no ta haci nada. E director a bin mas cu cien biaha wak e situacion na waf pero nada a pasa te ainda.

Maduro a subraya cu awor cu e situacion aki a sosode Minister no mester warda mucho pa manda e director cas, pa haci un investiga, pasobra e sa di e situacion dificil y peligroso cu tin na waf.

   HOPI FAYO:

Maduro a menciona cu e director di Aduana a comete hopi fayo caba y falta di integridad y tin rapportnan tocante esey, pero gobierno no ta haci nada y e ta sinti algo straño tin den e asunto aki. Incluso el a indica cu e sindicato a gana caso contra e director den Corte pasobra e ta desvia di e ley.

A expresa tambe cu DRH no ta mucho leu pa loke ta falta di integridad ora di traha bevordering. Edward Maduro ta sinti cu e ta e victima cu e director aki ta trata di silencia, y e ta lamenta cu e situacion a bay asina aki. E ta spera cu e ministernan cu ta papia di integridad ta tene cuenta cu e asunto aki y cu nan pone e persona concerni como responsable. SADA a entrega un carga na gobierno, diamars mainta, splicando tur esaki.

Den edicion di awe tin mas detaye di e asunto, incluyendo e accion cu Douaneronan lo tuma awe Diaranzon.

 

- Advertisement -

DUNA COMENTARIO

Please enter your comment!
Please enter your name here