Director di DIP Ing. Haime Croes cu relato amplio tocante e caso di tereno na Alto Vista

    473
    0
    SHARE
    - Advertisement -

     “Gobierno no a kita tereno di ni un hende”

    ORANJESTAD (AAN) – Ing. Haime Croes, director di Departamento di Infrastructura y Planificacion (DIP), den conferencia di prensa Diaranzon mainta, a referi na un caso cu recientemente a sali publica, cu DOW Y DIP a kita tereno di hende despues di cien  100 aña di ta propietario, y cu nan ta haci abuso di e tereno, pasobra nan a kita tur nan pertenencianan.

    Haime Croes a bisa cu pa cuminza e tin cu bisa hopi cla cu loke a sali den prensa no ta cuadra cu berdad, y categoricamente e subraya cu e gobierno aki no a kita ningun tereno di ningun hende.

    Loke si sr. Haime Croes kier a mustra ta kico a tuma lugar y a mustra un mapa di e tereno na Alto Vista, cu ta un tereno di huur, di sr. Ervin Giel, cu a wordo kita for dje pa ex-minister sr. Sevinger, na 2016.

    El a menciona cu dia 15 di Maart, un carta a sali pa notifica sr. Giel cu nan a kita e tereno. Sr. Haime Croes a subraya cu for di 2016 no por tin actividad mas riba e tereno aki, y esey kiermen cu tur cos cu pasa eyriba desde 2016, ta ilegal.

    Director di DIP a splica cu e tereno aki ta un domein ground, pero tin dos tipo di domein ground. Un cu un persona por huur pero e no ta doño, pasobra e ta un tereno openbaar y cu gobierno por kita segun prioridadnan cu e tin, y e persona mester cumpli cu voorwardernan. Un huur ground, mayoria di biaha ta pa traha landbouw (sembra y cuido di bestia), y no ta pa coba ni pa haci fiesta den dje.

    Na di dos, tin e domein huur cu ta pa hendenan cana y no pa haci cosnan priva. Ing. Haime Croes a señala cu mapa den man, cu riba e tereno ey tin bungalows, siendo cu no por traha nada riba dje y menos sin permiso. Esnan cu a tuma e tereno a culpa, inhustamente, e bisiñanan cu ta pasa door di e tereno, cu nan ta stroba nan den nan actividad.

    Director di DIP a reitera cu for di 2016 no mag di tin actividad riba e tereno aki. Banda di esey den e map di ROP  por mira cu e ta den area berde, kiermen area proteha (ground gebied) y esaki for di 2009, pues no di awo.

    Director di DIP a señala cu den tur esaki gobierno a actua corectamente. El a sigui splica cu na Mei, el a wordo yama na su cas, pa e bisiñanan (di e tereno), informe cu tin yen di truck ta bayendo riba e tereno y nan a puntra DIP kico esaki ta, si lo tin transporte di santo, y nan a yama polis, y polis a yama sr. Croes.

    Polis a para e actividad y a splica e personanan cu e tereno ey no ta di nan y cu gewoon nan tin cu compronde cu nan no mag di tey riba.  Pero aparentemente nan no kier a tende y a sigui y yega mas ley.

    Pa evita problema, director di DIP a yama nan bin cerca dje hunto cu polis, y a bolbe splica nan cu esey ta un tereno natural proteha pa gobierno for di 2016, y pa no culpa e bisiñanan; nan no por yuda y nan ta biba trankil y mester di nan pasada.

    E director di DIP a ofrece nan un landbouw y a duna nan un tempo pa nan kita nan cosnan, y despues di esey nan a keda un tempo keto, pero na Augustus ultimo, el a bolbe haya yamada di e vecindario y di polis cu e problema tey bek. Dia 13 di Augustus Director di DIP a manda un carta na Hulandes pa sres. Giel y de Cuba pero despues a pensa cu mihor mande tambe na Papiamento, y esey a bay dia 21 di Augustus.

    Aki, DIP ta pidi conformacion di e personanan, por escrito, cu nan ta bay di acuerdo pa desaloha e tereno en cuestion den e periodo cu DIP a otorga nan, esta dos luna.

    Kiermen, sr. Haime Croes a sigui splica, cu pa dia 13 di October proximo e tereno mester ta completamente desaloha. Den caso cu DIP no ricibi confirmacion por escrito, y si dentro di un siman no ricibi contesta cu nan ta di acuerdo cu e posicion di DIP, lo instrui DOW pa desaloha e tereno.

    Ademas, DIP a participa cu e hekinan poni riba e tereno, lo wordo remove pa DOW. Kiermen, nan tabata sa cu e tereno ta publico y cu e instancianan ta bin kita tur cos cu tin riba dje. Sr. Haime Croes ta haya hopi lamentable cu full un entrevista a wordo haci cu e personanan envolvi, pero no a pone e cartanan di DIP riba mesa, y cu e informacion no ta cuadra cu berdad ni cu e reglanan vigente.

    El a reitera, finalmente, cu e famianan concerni tin e opcion di bin DIP combersa y wak si nan por yega na un huur ground pa un landbouw,  pero bao di e condicionnan stipula, pasobra DIP kier cumpli cu tur hende. Nan tin cu compronde cu esaki ta reglanan di gobierno.

    - Advertisement -

    DUNA COMENTARIO

    Please enter your comment!
    Please enter your name here