ORANJESTAD (AAN): Manera ta conoci, a surgi conflicto entre Raad van Toezicht di Fundacion Lotto pa Deporte, y nan director Di Stefano Wernet.
Tabata na luna di Januari di e aña aki, cu Di Stefano Wernet a wordo informa cu e ta wordo suspendi for di Lotto pa Deporte, pa asina haci un investigacion. Como 3 luna despues el a wordo informa cu e ta wordo retira inmediatamente, y nan ta acuse di e.o. malversacion y di enriquece su mes.
Di Stefano Wernet a dicidi di entabla un caso na Corte, pasobra e no ta di acuerdo cu e forma con esaki a tuma lugar y tampoco e ta satisfecho cu resultado di e investigacion.
Lotto pa Deporte a indica cu nan tin motibonan urgente pa retira Wernet. Nan a papia di malversacionnan, manera e.o. cu na 2018 el a pasa man pa e suma di 6.700 Florin pa “educacion permanente” sin duna responsabilidad claro pa esey. Tambe a tuma adelanto pa e “Performance Bonus” sin cu Raad van Toezicht a duna OK por escrito pa esey, y segun poni den e acuerdo di trabao.
Tambe a acusa Wernet di no ta informa Raad van Toezicht cada cuartal di e prestacion y resultado financiero di e Fundacion, manera ta poni den e acuerdo di trabao. Raad van Toezicht ta acuse tambe di e transferencia di un suma di 612.046 Florin di e Lottery Account pa e cuenta bancario di FLPD, como resultado di cual a surgi un reclamo pa e suma aki di Canadian Bank Note riba FLPD cu e consecuencia a bin na un resultado negativo pa 2018.
Tambe cu el a wanta atras como 1/3 parti di e pagonan mensual na Stichting Sportsubsidie Aruba. A acusa Di Stefano Wernet di transferencia di dos biaha un suma di 100.000 Florin pa e cuenta bancario di FLPD for di un cuenta di banco cu tabata destina pa Piscina Olimpico, sin cu a informa Raad van Toezicht di esaki. Tambe ta acusa Wernet di a haci diferente donacion sin cu tabatin un presupuesto haci, y pesey a presenta un saldo negativo di 80.000 Florin riba e cuenta bancario di FLPD, y tambe entrega di mas donacion, no obstante cu Raad van Toezicht a dune prohibicion pa esey. Tambe ta acuse di no ta cumpli y mantene cierto asunto secreto, segun articulo 9.1 di e acuerdo di trabao. Tambe algun punto mas.
Pero segun Di Stefano Wernet, e tabata di bay tuma un curso na Hulanda den cuadro di educacion permanente, y segun articulo 5.2 di e acuerdo di trabao, e tin derecho di haya pago pa e costonan di estudio. Na final Wernet no a sigui e curso na Hulanda, pasobra debi na e diferencia di opinion entre Ministro y Raad van Toezicht, no tabatin chens mas pa esey. El a bisa cu Raad van Bestuur ta bon na altura di esey. Di banda di FLPD, nan ta desmenti cu e desacuerdo entre Ministro y Raad van Bestuur lo por stroba Wernet na participa na e curso na Hulanda. Segun FLPD, nan ta kere cu Wernet a djis tuma e suma di 6.700 Florin pe mes.
FLPD no tin problema si e sigui curso, pero ta disputa cu no tin ningun prueba cu el a sigui e curso of no.
Encuanto e Performance Bonus, Di Stefano Wernet ta mustra cu e no a tuma ningun adelanto riba e bonus ey, pero el a pidi adelanto riba su ‘dertiende maand’. Y esey ta cuadra cu su acuerdo di trabao.
Den otro asunto, Di Stefano Wernet ta insisti cu Raad van Toezicht e tempo ey tabata na altura di e suma di 612.046 Florin cu a wordo transferi di e Lottery Account pa e cuenta bancario di FLPD, y cu Raad van Toezicht ta na altura di e motibonan di e traspaso. Segun Wernet, e motibonan tin di haber cu costonan di Mercadeo y Public Relations, y tambe e costonan di e asistencia huridico cu Raad van Toezicht a haci relaciona cu e diferencia di opinion y e procedimentonan huridico. Wernet a insisti cu e transferencia di 312.046 Florin a wordo aproba explicitamente door di Janga.
Relaciona cu e acusacion cu Di Stefano Wernet a wanta aden como 1/3 parti di e pago mensual na Stichting Sportsubsidie Aruba, aki e Director a bisa Corte cu esaki a socede cu conocemento di Raad van Toezicht.
Di Stefano ta bisa cu FLPD a acuse inhustamente den e carta di retiro, cu dos biaha el a saca 100.000 Florin di un cuenta bancario riba cual un suma di 2 miyon Florin ta deposita na beneficio di Piscina Olimpico. Wernet a mustra cu FLPD kier a upgrade e sistema di pomp di e Piscina Olimpico y pesey tin di paga e suma di 1.050.000 Florin. E sacamento di e suma di 200.000 Florin pues n oa perhudica e upgrading di Piscina Olimpico. Aki FLPD no a bin cu ningun contesta riba e declaracion haci.
Den fin di siman, Corte di Prome Instancia a dicta sentencia den e caso. Hues a dicta na fabor di e Director, pues na opinion di Corte, e retiro inmediato no tabata hustifica.
E veredicto a conclui cu a keda suficientemente proba cu e retiro di inmediato no tabatin base, y no tabatin motibo urgente hustifica. E decision di Hues aki nifica cu Di Stefano Wernet tin derecho pa sigui ricibi su salario, cual a worde para for di Januari 2019.
Esey no ta tur, como cu Hues a mustra cu e por cobra un interes riba e salario atrasa cu nan tin pa dune awor cu forza retroactivo, te cu un maximo di 15%.
Tambe e peticion haci pa ordena FLPD pa laga Wernet sigui haci su trabao como director, manera semper, a worde otorga.
Corte ta di opinion cu aki no tin motibo pa no permiti Di Stefano Wernet pa traha. E ponencia di FLPD cu “no tin confianza mas”, no ta cambia pensamento di Hues at all. Ademas, e fundacion no a trece punto dilanti pa demostra cu tin falta di confianza.
Corte di Prome Instancia a pone un multa di 1000 Florin pa cada dia cu no cumpli cu e sentencia aki te cu un maximo di 100 mil Florin. Tambe e fundacion mester cubri e casonan di e caso di Corte aki, incluyendo nan mester bay paga e salario di e abogado di Wernet.
