ORANJESTAD (AAN): Riba Dialuna cu a pasa, Departamento di Finanzas a pasa e pago di salario di docentenan via banco. Inmediatamente hopi di nan a bin nota cu nan salario no ta completo.
Mesora docentenan a cuminza comenta, cu e salario di fin di September tin un discrepancia di como 80 Florin, y ningun hende por compronde e motibo.
Pero algun rato despues, e cantidad di docente cu a ripara cu nan a haya menos placa, a sigui crece y reclamo a hasta yega na oido di e.o. Sindicato SIMAR, como tambe demas instancianan.
Algun a bin realiza, cu e suma exacto cu a wordo kita di nan salario, ta di 78 Florin.
DIARIO a compronde cu ya caba e docentenan no ta hopi contento di e forma con Gobierno ta atende nan asuntonan, y awor pa colmo ta bin haya un golpi di placa menos fin di luna.
A kita casi 80 Florin di nan salario, sin duna ni un tiki splicacion di e asunto aki.
Sindicato SIMAR a manda un mensahe pa nan miembronan, pa check kende mas a haya menos placa e luna aki riba nan salario. Y e reaccion tabata grandi.
Esaki a forza cu por lo menos un instancia a bay investiga ta kico a pasa.
FAYO DI FINANZAS:
Despues a sali afo, cu tur culpa ta wordo tira riba Departamento di Finanzas. Nan a haci esaki na nomber di Gobierno di Aruba, y ta encera un “Coreccion General”. Esaki pa e asina yama ‘NPR Werkgeversbijdrage’ pa e Pensioen di APFA.
Sinembargo, e coreccion aki tabata aplicable pa e periodo di Januari 2019 te cu Juli 2019. Pues e no ta conta pa docentenan nobo cu a cuminza traha despues di 1 di Augustus 2019.
E coreccion aki en realidad no tabatin mester di tin ningun influencia riba e salario di e docentenan. Sinembargo debi na un eror di Departamento di Finanzas, un suma a wordo kita accidentalmente for di salario.
Ya caba Finanzas a wordo informa di e eror aki. Pues ta mustra cu e “Coreccion General” aki ta cay bao di responsabilidad di Gobiern, y pesey Departamento di Finanzas lo bay coregi tur esaki na final di luna di October. Pues otro luna tur docente lo haya e 78 Florin aki bek.
