Maestro y maestranan a subi caya
ORANJESTAD (AAN): Docentenan disgusta cu desde Juli 2019 nan no a haya contesta mas riba e Manifiesto entrega tanto na Gobierno como tambe Parlamento, a dicidi subi caya un biaha mas riba Diabierna.
E biaha aki den oranan di atardi nan a aglomera dilanti oficina di Conseho di Ministro, y a exigi pa topa cu Ministro Presidente Evelyn Wever-Croes pa entrega un manifiesto nobo. Nan no tabata desea di haci esey cu Ministro di Enseñanza Rudy Lampe.
Finalmente tanto Ministro Presidente y tambe Ministro Lampe a sali pa topa cu e docentenan cu a yega eynan despues di scol cu a bay protesta y indica fuertemente cu nan no tin confianza mas den Ministro di Enseñanza.
Cu T-shirt di “Enseñanza bao Atake”, nan a scucha con nan representante Juffrouw Soraya a lesa e manifiesto na Premier Wever-Croes. Nan tabata grita constantemente nan lema di “Respet Awor”. Y ora cu Ministro Rudy Lampe a sali for di e portanan, nan a grita un ‘boe’ masha grandi.
E docentenan ta mustra cu nan no tin confianza mas den Ministro di Enseñanza, y den e carta a pone enfoque con prome cu Vakantie (Juli) a entrega un carta caba, y te cu 13 di September no a haya contesta. Docentenan sa cu parlamento a pidi Ministro pa pone tur decision on-hold pa asina sinta y dialoga prome cu scol habri bek.
Pero toch scol a habri bek, y cambionan tabata wordo tuma ad hoc door di Ministro Rudy Lampe, unda cu e.o. OAA (scol anochi), Middag MAVO, SPO, Scol Preparatorio, Scol Primario, MDC (Multi Disciplinair Centrum) a cera, pues tin hopi detaye cu toch a ser tuma door di Ministro.
Esaki ta nifica cla y raspa, cu e preocupacionnan di docentenan no a wordo scucha, ni e ordo duna door di Parlamento a wordo teni cuenta cune door di e Ministro. Si Ministro ta blo bisa cu e kier dialoga, e docentenan kier sa unda e dialogo ta.
Pa tal motibo, e docentenan mes a dicidi cuminza cu e accion aki. Claro cu nan a pidi respaldo di nan Sindicato, y a haya esey mes. Docentenan simplemente ta preocupa cu e direccion cu enseñanza ta bayendo y ta bati alarma na Gobierno.
E Manifiesto a haci un suplica pa stop inmediatamente cu e cortamento den presupuesto di enseñanza.
Na momento cu tabata lesa e Manifiesto na Prome Ministro, por a tuma nota con e docentenan a cuminza grita den coro “Respet Awo” y tambe tabata grita “Lampe Afo”.
Docentenan ta spera di por haya contesta rapido di Ministronan, y tambe di Parlamento riba nan Manifiesto, sea 1 of 2 siman.
Prome Ministro Evelyn Wever-Croes den su prome palabranan a indica cu e situacion financiero di e isla ta hopi dificil, y cu hopi dolor na curazon e cortamentonan ta tumando lugar den enseñanza.
