Home Tempo E  “Charlie Bravo” pa aviacion y condicion di tempo

E  “Charlie Bravo” pa aviacion y condicion di tempo

49
0
SHARE
- Advertisement -

Pa un aeropuerto por funciona, mester di un departamento meteorologico cu ta entrega na avionnan e condicionnan di tempo cu nan por spera riba e ruta cu nan ta bay cubri.

Meteorologia ta uno di e servicionan indispensabel pa biahe cu avion y riba lama. Observadornan na e departamento ta encarga cu observacion di tur detaye natural manera forsa y direccion di biento y tipo di nubia cu ta presente.

E observacionnan aki ta hopi importante pa determina e condicion di tempo na Aruba.  Nan ta indispensabel pa por pronostica kico ta bay pasa realmente cu tempo riba termino cortico.

Hopi bes den boletin di tempo cu ta cubri 24 ora, ta nota cu nan ta papia di “posibilidad pa awasero” Den otro caso ta papia di “posibilidad pa awasero cu por ta acompaña pa strena y lamper”.

E palabra “posibilidad” ta mustra publico cu tin chens cu e condicion aki ta presenta su mes. Mas largo e tempo durante cual ta pronostica tempo, mas chens tin cu mester adapta loke a wordo pronostica.

E observadornan den e mundo di meteorologia mester duna e detayenan cu por conduci na un boletin extra den casonan extremo.

E observadornan ta mira cu e tipo di nubia cu tin ta cambia. Nubianan den e parti halto di atmosfera, pues halto dor di tera, cu no ta trece awasero, diripiente por wordo compaña pa nubianan di awasero si e condicionnan ta faborabel.

Tin nubia di bon tempo, manera nan ta wordo yama. Nubianan bunita.

Pero na momento cu Charlie Bravo presenta, meteorologonan ta den estado di alerta.

For di fin di Maart, ora e Zona di Convergencia Intertropical bira activo riba Venezuela y sigur afecta e Lago di Maracaibo, Aruba por mira lamper pa Zuid.

Esaki ta e indicacion cu tin “Charlie Bravo” presente na e luga caminda e lamper ta origina.

Charlie Bravo, e nomber di cariño di CB (Cumulus Nimbus) ta e nubia cu ta cubri tur parti di atmosfera di abou te ariba.

Observadornan ta mira e prome señal di su presencia y ta sigui su rumbo.

Charlie Bravo por cana na forma solitario. Den e caso, e condicionnan di tempo di awasero cu hopi biaha strena y lamper ta dura mientras e tin bida. Nan ta stop ora e nubia muri.

Charlie Bravo por crece den grupo. Den tal caso, ta mas cu un nubia enorme ta produci strena y lamper y yobida pisa.

Mas halto e CB bira, mas intenso e condicion di tempo.

Ta Charlie Bravo ta ocasiona squall lines, linea di mal tempo ora frentenan friu ta biaha.

Ta importante pa scucha informacion di Departamento Meteorologico di Aruba, cu ta menciona kico ta di influencia pa Aruba. Un Ola Tropical por ocasiona presencia di Charlie Bravo riba costa di Venezuela of den vecindario di Aruba.

Departamento Meteorologico ta pone Aruba na haltura ora tin desaroyo riba termino cortico cu su personal ta controla continuamente.

Mester evita cu falta di conocemento ta crea e impresion cu ta “horcan tin den vecindario di Aruba” pasobra diripiente un nubia ta cambia e condicion di tempo.

- Advertisement -

DUNA COMENTARIO

Please enter your comment!
Please enter your name here