Home Editorial E reto y oportunidad di turismo pa Aruba na 2019

E reto y oportunidad di turismo pa Aruba na 2019

22
0
SHARE
- Advertisement -

Editorial

E hecho cu dia 27 di September ta Dia Internacional di Turismo, ta un motibo pa Aruba e siman aki confirma importancia di su unico pilar economico actualmente.

Si mundo ta celebra Dia Internacional di Turismo ta pa motibo cu no ta Aruba so a realisa con importante e sector di turismo ta pa economia.

Na 1986 a uza turismo como e formula pa amplia economia ora Lago a cera su portanan. Aruba na añanan 80, no tabata e unico pais na mundo cu a dicidi pa e maneho aki despues di crisisnan petrolero mundial.

E siman aki henter nos comunidad mester revisa loke a pasa pa asina consolida nos turismo.

Aruba ta parti di economia mundial cu na inicio di Siglo 20 a cambia a base di avancenan tecnologico. Den e proceso aki petroleo a crea posibilidad nobo pa industria y inversion.

Turismo a bira fuente economico despues di Segundo Guera Mundial, cu a produci un epoca di oro cu hunto cu tecnologia moderno a crea turismo como pilar economico mundial.
Na Aruba dos factor esencial a uni den turismo crucero durante e epoca di oro menciona. Barconan di turista por a haya servicio maritimo incluso combustibel. Na mes momento e turista tabata haya oportunidad pa cera conoci cu e isla di lama, solo y beach unico.

Pero tabata tin algo mas tras di e crecemento di sector di crucero y e cadenanan internacional cu a establece nan mes na nos pais.

Arubianismo tabata propaga su mes den naturalesa, hende, economia adapta na e pais cu su pasado Indjan, hancra den su cultura y uni na e influencia Europeo cu un nivel halto di bida, educacion, trankilidad politico.

E pakete aki a keda e instrumento esencial ora turismo mester a bira e pilar economico di Aruba cu awe mester para keto y pensa bon kico e ta haci.

Aruba mester tene cuenta cu e reto grandi di cual celebracion mundial di Dia di turismo ta ehempel.

Na 2019 mundo ta celebra Dia di Turismo na India, cu asina e organisacion di turismo di Nacionnan Uni, ta sostene como destinacion turistico. E historia, cultura, hende di India ta e propaganda pa presenta India na henter mundo.

Nacionnan Uni ta yuda paisnan den desaroyo atrae turismo pa crea nan pilar economico. Esaki ta nifica cu diariamente e competencia pa Aruba ta crece.

Esaki ta e reto pa Aruba cu mester tene duro na Arubianismo.

E problemanan entre Merca y Cuba, e caida di turismo na Republica Dominicano pa motibo di enfermedad fatal, e temor pa temporada di horcan y region di Caribe y e miedo pa instabilidad politico, ta crea oportunidadnan pa Aruba.

Awe nos mester pone oportunidadnan actual y nobo enfrente nos reto pa mantene nos destinacion multilingual, cariñoso, alegre, trankil, respetuoso cu su propio caracter y espacio pa hende gosa di reposo.

Vacacion ta keda un escape pa hende, cu kier hari y gosa leu for di tur problema cu e ta laga na cas. Un turista kier e pais diferente di tur otro cu semper Aruba tabata y ta.

Laga nos uni den e siman di Dia Internacional di Turismo pa sigura futuro di nos paraiso unico na mundo!

- Advertisement -

DUNA COMENTARIO

Please enter your comment!
Please enter your name here