Home General Economista Marapin: Turismo ta stabil y tin espacio otro sectornan

Economista Marapin: Turismo ta stabil y tin espacio otro sectornan

155
0
SHARE
- Advertisement -

Aruba no mester aventura mas cu Citgo

ORANJESTAD (AAN) – Den entrevista cu e Economista sr. Ben Marapin, el a elabora tocante e refineria di Aruba, cu ta un sector riba cual semper e tabata hopi critico, sin mucho confianza den dje, y cual contrato el a lesa y ta considere hopi malo.

Marapin a señala cu Aruba ta mara na e contrato di un refineria cu ta di Aruba pero kico pa haci cune, e no sa.

E ta admiti cu turismo ta e unico pilar economico pa Aruba, pero riba su mes e no ta un hecho su so, den sentido cu turismo ta bin di diferente pais, y diferente tipo di turista.

Esey kiermen cu tanten cu hende tin placa y kier biaha Aruba lo ta riba page como un bon destinacion cu tur loke nos isla tin di ofrece, y pesey Aruba semper ta score hopi bon ora ta puntra e turistanan con nan ta haya e destinacion Aruba. El a subraya cu e no ta un persona cu ta mira Aruba su turismo vulnerable y cu bisa cu e ta bay cay, y a pone como ehemplo e caso Holloway cu apesar di e boicot cu a purba haci, e efecto a keda basta limita, y a pick up hopi lihe y esaki ta un punto hopi cardinal.

Ben Marapin a señala cu e turismo di Aruba ta hopi stabil y por hacie mas stabil ainda door di busca mas mercado y traha duro pa garantiza e calidad di nos pais su turismo.

Sin duda Merca ta e mercado mas grandi pa Aruba, pero e ta mira Chiles y Colombia por ehemplo, como paisnan cu hopi perspectiva. Europa ta keda semper un mercado hopi interesante, pero solamente cu e distancia ta hopi largo y esey ta keda un factor.

No obstante por nota cu hopi hende no ta preocupa pa viaha hopi ora den avion. Prijsnan ta bira hopi atractivo y Aruba ta un destinacion hopi gusta y esaki ta crucial.

E economista a subraya cu no mester lubida cu Aruba ta un pais chikito y cu no mester tin hopi pa bira atractivo, y pesey e ta haya cu prome cu grita pa otro pilar, y gasta cen di mas den aventuranan manera Citgo, cu a costa nos pais hopi placa, enfoca riba loke nos tin, nos por y amplia esaki.

Ben Marapin a acentua cu tin mas lugar pa crea espacio pa gana divisas loke ta conoci como diversificacion. Ki fuentenan Aruba tin pa haya divisas y cu por traha riba dje cu e factornan propio, manera tereno di shipping unda barconan ta para riba e awanan teritorial di Aruba y e ta rindi placa caba.

E economista sr. Marapin a splica cu el a contribui cu esey door a haci un analisis, y e ta kere cu e sector aki por rindi hopi mas pero tin cu traha riba dje, y esaki ta un fuente apart di turismo.

Marapin a subraya cu mester percura pa e barconan cu ta haya servicio na Aruba no bin cu oil spill pasobra esey ta daña nos beachnan, pasobra esey si por bira un peligro pa Aruba.

El a reitera cu Aruba su turismo ta hopi stabil, pero naturalmente ora e economia mundial ta colapsa nos pais ta sintie, manera henter mundo a pasa den na 2008-2009. Pesey ta hopi importante pa tene un finanzas publico sano, un debe cu no ta grandi, den un situacion asina tin espacio como gobierno pa desaroya cierto proyectonan pa alivia e situacion.

Marapin a expresa cu lamentablemente Aruba a fia cen di mas, nos pais tin un debe astronomico, ta paga mas cu 240 miyon na interes anualmente, y si e debe lo tabata loke tas suppose di ta, lo a paga alomenos lo a paga 20 miyon menos na debe na interes, y esey ta placa cu por a uza pa otro cos.

 

 

 

 

 

- Advertisement -

DUNA COMENTARIO

Please enter your comment!
Please enter your name here