Empleadonan di ATA a duna Sindicato mandato pa bay den accion

    197
    0
    SHARE
    - Advertisement -

    Plan pa welga den siman venidero

    ORANJESTAD (AAN): Directiva di Sindicato di Trahadornan di Aruba (STA) a reuni Diaranzon atardi 18 di September 2019, 5’or cu su miembronan emplea na ATA Suigeneris pa locual ta trata e situacion pa cu e negociacionan pa cu e Contrato Colectivo nobo pa e compania. Un reunion bon asisti caminda e empleadonan a expresa nan mes.

    DIARIO a compronde cu Sindicato STA ta reuniendo cu gerencia di ATA for di November 2018 caba pa trata na yega na un contrato colectivo bon balansa pa e empleadonan di e compania.  A ser splica, cu Sindicato STA a entrega un concepto den cual tur e puntonan cu tabata rekeri cambio a worde treci dilanti.

    Segun STA, lamentablemente gerencia di ATA ta keda para terco y bisa cu no tin placa pa locual e sindicato a trece den su concepto y a “tira culpa riba e gobierno” actual cu a manda un carta pa ATA cu lo ta prohibinan di duna aumento na e empleadonan pa locual ta trata nan salarionan y beneficionan.

    Ora e negociacion a tranca a recuri na intermediacion di mediador di gobierno kende despues di a delibera cu e partidonan a trece un “tussenvoorstel” riba mesa cu tambe gerencia di ATA a bari for di mesa.

    Directiva di STA ne momentonan ey a dicidi di solicita un reunion cu minister Dangui Oduber conhuntamente cu e empleadonan di ATA cual reunion a worde concedi pa e mandatario caminda cu mayoria di e empleadonan a expresa nan malcontento cu gerencia di ATA pa cu nan actitud terco y te hasta a expresa c deseo pa mira un cambio den e gerencia di ATA Suigeneris.

    Minister na su turno a bay haci su “huiswerk” caminda el a solicita e structura salarial di ATA Suigeneris y tur e salarionan di e personal cu te cu dia di awe seguna nos tin comprendi cut e no a hays tampoco.

    Tin empleadonan den ATA cu apenas ta gana 2.300 Florin pa luna y otronan cu ta riba 8.000 Florin pa no papia mes di gerencia di ATA.

    Segun STA, ta tristo pa mira un compania cu ta genera asina hopi placa ta trata su empleadonan cu ta traha cu alma y cuerpo pa pasha nos turismo di e manera aki y directiva di STA ta lamenta e actitud terco cu te cu awe ta ser hiba na mesa di negociacion apesar cu mediador di gobierno a haci tur intento pa e partidonan yega na otro no ta mira salida pa motibo di terquedad cu a lo largo lo bay desemboca den un accion di protesta di parti di e empleadonan miembro di STA den e siman venidero si no mira un solucion concreto riba mesa.

    Directiva di STA ta mandando un carta pa gerencia di “ATA Suigeneris” cu e ultimo proposicion presenta na nan cu copia pa minister Dangui Oduber y tambe minister di labor minister Glenbert Croes cu ultimatum pa termina e CAO promer cu dia 26 di September 2019 sino lo bay tin accion.

    - Advertisement -

    DUNA COMENTARIO

    Please enter your comment!
    Please enter your name here