Home General Empresa di Estado: negoshi di gobierno cu placa di pueblo

Empresa di Estado: negoshi di gobierno cu placa di pueblo

363
0
SHARE
- Advertisement -

Analisis

Segun e concepto di democracia, pueblo ta vota pa un gobierno cu na bienestar di pueblo ta tuma decisionnan. Pueblo ta paga belasting pa asina tin fondo pa por goberna e pais di acuerdo cu deseo di pueblo.

Paisnan democratico liber asina a introduci e sector priva cu empresa a base di comerciantenan y nan placa y e sector publico cu ta gobierno cu ta uza placa di pueblo pa por goberna.

A yega e momento cu e politiconan tabata tin problema pa maneha e placa di pueblo na interes di pueblo. Esaki a haci cu a dicidi di saca cierto departamento for di man di gobierno y haci nan empresa priva.

Departamentonan encarga cu asuntonan importante pa pueblo asina a bira empresa di estado. Pueblo, cu segun cierto politiconan ta sumamente bobo, a comprende bon cual direccion e desaroyonan lo a tuma y for di prome momento a papia di compania di gobierno.

Tras di e creacion di empresa di estado tabata sconde e ideal cu ta bay evita politiconan di hunga politica cu fondo di pueblo y cu gobernacion. A entrega asina na politica e miho formula pa keda leu di placa di pueblo pero directamente cu poder riba placa di pagadonan di belasting.

Pa e negoshi di companianan di estado, mester naturalmente un hunto di comisario. Den negoshi priva, comerciantenan cu ta participa den e compania, ta nombra nan hunta di comisario.

Den gobierno ta gobernantenan ta nombra hunta di comisario cu ta dicidi kico ta pasa cu placa di pueblo cu of sin bendicion di e gobernante cu a duna nan un puesto di honor.

Pues e placa di pueblo ta wordo dirigi dor di un compania di pueblo, cu a bira un compania di gobierno. Na cabes di e compania tin un director cu politiconan ta nombra cu bendicion di e hunta di comisario cu politiconan ta nombra.

Nos no ta generalisa. Nos ta un pais di hende decente y den hopi caso personanan cu haya chens pa dirigi un compania di gobierno cu placa di pueblo, ta actua na beneficio di pueblo.

No por kita sinembargo for di e realidad, cu pueblo a perde herment di gobernacion bon regla den departamentonan di gobierno.

Compania di gobierno pa hende di mala fe, cu tambe tin de bes en cuando, ta duna oportunidad pa gobierno mete su man manera e kier den e compania. Ta pone amigo di politiconan den posicionnan unico cu un salario cu solamente compania di gobierno ta paga.

Por lo general empresa priva ta mas cuidadoso cu e placa cu e ta gasta, pero esaki ta sigur relaciona cu e hecho cu den sector priva, placa ta bini di cartera priva y no di pueblo.

Na momento cu mester aplica ley, no por haci nada pasobra compania di gobierno no ta departamento di gobierno.

Pa democracia no wordo transforma den e berdad di e tres macaconan cu no ta tende, no ta mira, no ta scucha, a bira tempo pa areglonan cu ta duna pueblo mando riba departamento, bira regla pa goberna e empresanan cu ta di pueblo.

Mester pone un fin na negoshi cu entrada cu pueblo mester produci pero cu gastonan cu politica ta dicidi.

Refineria di Aruba a duna un ehempel cla con por hunga cu asuntonan legal. Pa evita cu negoshinan di estado ta baca di lechi pa hende cu ta abusa di placa di pueblo, ban exigi areglo nobo.

Ta basta cu salarionan di sheik, gastonan personal di privilegiadonan mientras pueblo ta come pan y bebe awa pasobra su placa a bay pa paga debe nacional y contractonan sabroso cu politiconan sinberguensa a laga como herencia.

- Advertisement -

DUNA COMENTARIO

Please enter your comment!
Please enter your name here