Home Hudicial Fiscal a apela sentencia contra homber sospecha di trafica 357 kilo di...

Fiscal a apela sentencia contra homber sospecha di trafica 357 kilo di cocaine declara liber

360
0
SHARE
- Advertisement -

ORANJESTAD (AAN) – E sentencia di Corte den Promer Instancia di April 2019, tabata un sla duro pa Fiscal cu a exigi 12 aña di prison pa e homber Venezolano R.S. y Hues a declara e sospechoso liber. Esey ta motibo cu Fiscal a apela e sentencia y e luna aki tratamento di e caso aki ta tuma lugar. 

TRAFICA DROGA DEN BODYPART DI AUTO

Dia di tratamento di e caso na April 2019, Hues a mustra cu CID a haya informacion cu tin un persona cu ta deal den cocaine ta preparando 300 kilo di cocaine pa hiba Belgica. Hues Comisario a duna permiso pa scucha cellular. Ora a scucha ta R.S. e ta papia cu un K. cu tin un compania di transporta container. Esaki tabata na 5 December 2017 caminda lo tabata papia di 5 container.

A papia cu Douane pa check si tin containernan cu lo bay Hulanda. A resulta cu ta asina y a confisca container cu heru bieu, partinan di auto, destina pa Hulanda y despues Antwerp. A detene K. y interoga. A haya 2 container cu 30 porta patras di porta di pick up del cual tabatin 258 bloki cu a pisa 357 kilo di cocaine.

Hues a bisa cu dia 6 December 2017, tres Duanero a controla 2 container. Promer 2 cacho a controla e containernan pa droga y no a haya nada. Durante cu tabata carga e container e miembronan di Douane tabata controla tambe. Despues a seya e containernan. Ademas a pone candal.

E containernan a keda riba tereno na Piedra Plat y 8 December 2017 a hiba nan Barcadera pa transporta. Fiscal a laga confisca esakinan y hiba nan Savaneta Kamp caminda a bin haya 357 kilo cocaine scondi den 30 porta di baki di pick up.

Duaneronan a bisa cu e portanan aki no a wordo hinca ora nan a controla. Hues ta conclui cu despues di seya containernan a habri esakinan atrobe y hinca e portanan. Duaneronan a reconoce R.S. cu tabata esun encarga pa yena e carganan den e containernan. 

FAYO DEN INVESTIGACION

Hues a bisa cu e pregunta ta si ta R.S. tabata esun cu a hinca e portanan di baki di pick up y si e tabata sa cu tabatin droga den nan. Hues a mustra cu durante tratamento di e caso, R.S. a admiti cu riba orden di K. a yena e containernan y e no tabata sa di portanan di pick up.

Hues ta haya cu for di e investigacion haci, no ta cla si e portnan a wordo hinca dia 6 December 2018 of despues.

Tambe Hues a mustra cu no por saca afor si a kibra seyonan. No tin investigacion haci riba esaki.    Hues a mustra cu e homber K. a bisa cu e heronan bieu ta di R.S. y e containernan ta di R.S. Na opinion di Hues esaki ta un declaracion su so, contra esun di R.S. Tin un persona ta bisa cu R.S. ta traha eynan y ta encarga cu heronan bieu.

Hues a señala cu e doño di e tereno no a wordo scucha pa saca afor si di berdad R.S. a huur e tereno y cu e heronan ta di R.S.

Hues a sigui señala cu for di e tapnan di cellular no por conclui cu R.S. lo tabata papia di droga.

E recibonan cu a haya di R.S. el a splica cu ta pa K. el a bay haci’e. Hues ta haya cu esaki por ta posibel.

Hues a mustra cu Fiscal a señala cu R.S. ta biba den luho y lo mester tin entradanan ilegal. Hues ta haya cu investigacion a mustra cu R.S. ta dispone di suficiente entrada.

DECLARA LIBER

Hues a conclui cu for di e investigacionnan haci, no por proba cu ta R.S. ta culpable y pesey e ta declara R.S. liber. Ta asina cu R.S. a bolbe Venezuela. E luna aki e apelacion ta tuma lugar den sala di Corte di Husticia di Aruba. DIARIO lo informa lectornan dia cu e caso aki tuma lugar.

- Advertisement -

DUNA COMENTARIO

Please enter your comment!
Please enter your name here