Cancer di prostaat ta den e top 3 di cancer na Aruba
ORANJESTAD (AAN): Fundacion Contra Cancer di Prostaat Aruba (FCCP) diaranzon a lanza un campaña di concientizacion hunto cu Departamento di Salubridad Publico cu e lema: “Test bo sanger. Sigui disfruta di bid”.
Jurgen Benschop, Presidente di FCCP a duna di conoce cu hopi hende no sa cu cancer di prostaat ta den e top 3 di cancer na Aruba bao di hende homber, despues di cancer di cuero y cancer di pecho.
CIFRANAN
E topico di cancer di Prostaat ainda ta un tabu na Aruba, a remarca. Ariba un averahe di 40 caso pa aña nobo ta wordo constata di cancer di prostaat na e isla. Mundialmente, 1 di cada 9 homber ta wordo diagnostica cu cancer di prostaat, a indica.
Hopi hende no sa cu nan por sobrebibi e malesa. Locual tin cu haci ta constat’e tempran. Un di e metanan di e fundacion FCCP ta pa concientiza comunidad cu cancer di prostaat por wordo cura basta e wordo diagnostica tempran, Benschop a indica.
HACI TEST TEMPRAN
E presidente di FCCP a pone enfasis ariba e aspecto di haci tempran tempran y diagnostica e malesa aki tempran. Asina e chens pa sobrebibi lo ta hopi mas grandi.
E miembronan di fundacion, cual a wordo lanta na 2012, ta reuni un biaha pa luna y ta yuda hende hombernan y comunidad cu informacion. Nan ta haci presentacion tambe na companianan pa concientiza tanto hende homber como hende muher pa bay haci test di sanger, a agrega.
CAMPAÑA
E campaña cu nan a lanza y cu lo dura 3 luna ta precisamente pa informa kico cancer di prostaat ta y con por test p’e pa garantiza un comunidad sostenibel pa Aruba.
