ORANJESTAD (AAN) – Diadomingo ultimo, Aruba Triathlon Association a organiza e Guardian Group Duathlon Nacional pa mucha, junior y adulto. E atletanan a competi den e categorianan individual y den ekipo di relevo.
E evento a cuminsa na Boca Catalina. Diferente distancia a ser recori esakinan categoria Kids te cu 14 aña cu a core un total di 2.5 km, core bicicleta 10 km y finalisa e competencia cu coremento na pia riba un distancia di 1.5 km. Pa loke ta e categoria di Junior/Adulto male, esakinan mester core un distancia mas largo.
Prome a core na pia un distancia di 5km, despues subi bicicleta y recori un total di 20 km pa despues finalisa e evento cu un coremento na pia riba un distancia di 3km. Mester bisa cu e participacion tabata grandi cu hopi participante den Super Sprint y Sprint como tambe den relay.
E hobennan Justin Morales y Rebecca Jansen a gana den Super Sprint mientras Giannon Eights y Shami Clara a gana den Sprint. Den e prome parti di aña, e eventonan organisa pa Aruba Triathlon Association a kibra tur record unda mas y mas atleta ta tuma e reto y competi na e eventonan di triathlon, duathlon of aquathlon esaki sea individual of den relay.
