Home Gobierno Gobierno a honra Heintje Ras di Brazil pa su sosten pa comparti...

Gobierno a honra Heintje Ras di Brazil pa su sosten pa comparti historia di e isla

51
0
SHARE
- Advertisement -

ORANJESTAD (AAN): Diadomingo pueblo a topa cultura den e gran celebracion di e di 4 BarioFest y e Parada di Cultura cu a tuma luga na Brazil.

Bariofest ta un proyecto di Special Projects cu ta resorta directamente bou di Ministerio di Asuntonan Social.

Prome cu cada BarioFest, Special Projects ta duna oportunidad na pueblo pa nomina baluartenan, personanan cu a resalta den comunidad. Y durante Bariofest, e personanan aki ta worde reconoci.

Prome Minister Evelyn Wever-Croes diadomingo ultimo tabata tin e honor den number di Minister Glenbert Croes, di a entrega certificadonan di reconocemento na 5 baluarte di Brazil: Angelo Richardson, Giandrick van den Berg, Luis Inario Maduro, Heintje Ras y Vicente Ras. Cada nominado a resalta den diferente area. Y cada un, durante e siman aki, a haya un dia pa pueblo por conoce e motibo pa cua nan a worde nomina como baluartenan. Awe ta toca pa pueblo conoce un tiki di señor Heintje Ras .

Henry Franklin Ras, miho conoci como Heintje ta un tata di dos yiu kende alavez ta fungi como mama y tata logrando un famia hopi uni. Actualmente e tin 22 aña sirbiendo e pueblo di Aruba na Cuerpo di Bombero Aruba.

Pero loke mas ta resalta den señor Heintje ta su amor como coleccionista. Riba Facebook, señor Heintje tin su paginanan conoci como Museo di Antiguedad Nos Bieunan y ‘If you grew up in Aruba, You Remember’ na unda cu señor Heintje ta comparti historia, potretnan historico y potretnan di artefactonan di su propio museo.

E museo aki, señor Heintje tin ya pa dos aña caba na su cas na Rooi Master. E museo ta conta cu miles di artefactonan antiguo cu ta conta e historia di nos antepasadonan. Pa aña ta yega mas di 4.000 bishitante na su cas cu el a converti den un museo cu ta haya bishita di tanto hende local como hende internacional.

Señor Heintje tin hopi placer den loke e ta haci pa comunidad y su deseo principal ta pa pueblo siña conoce loke ta di nos mes. E ta organiza caminatanan den naturalesa na unda cu alavez e ta splica historia di Aruba. E ta un guia tambe pa mucha y adulto den e minanan di fosfaat y den e tunnel di awa.

Cultura pa Señor Heintje ta hopi importante y varios biaha el a declara su amor pa Aruba den e festival di ‘Un Canto na nos Himno y Bandera’.

Tur loke cu señor Heintje ta haci ta di curason y boluntariamente. Pa e motibo aki tambe, bario di Brazil a nomina señor Heintje como un baluarte di Brazil. Den nomber di Gobierno di Aruba y Minister Glenbert Croes, Prome Minister a felicita y gradici señor Heintje pa su amor y dedicacion pa comparti su conocemento cu Aruba henter.

 

- Advertisement -

DUNA COMENTARIO

Please enter your comment!
Please enter your name here