Home Gobierno Gobierno mester scucha posible operadornan interesa den e refineria di Aruba

Gobierno mester scucha posible operadornan interesa den e refineria di Aruba

288
0
SHARE
- Advertisement -

Minister Presidente ta compronde posicion di Ben Marapin, pero:

ORANJESTAD (AAN)—Den un entrevista cu DIARIO, e Economista y ex-director di Departamento Social-Economico, mr. Ben Marapin, el a mustra su posicion pa Aruba no tin un refineria mas, y pa no sigui cu e “aventura CITGO”, y a trece dilanti cu mihor cos pa haci ta reforza mas e turismo cu ta bayendo bon, y diversifica e tereno economico, por ehemplo ampliando e servicionan di shipping.

Den conferencia di prensa, Minister Presidente mr. Evelyn Wever Croes a menciona cu tin algun compania cu ta mustra interes pa tuma e refineria di Aruba over, y cu e lo sinta cu esnan interesa un bez cu logra termina e contrato cu CITGO.

Un pregunta di prensa a worde haci na e dignatario tocante e opinion di mr. Marapin, encuanto un Aruba sin refineria y e diversificacion cu e experto ta propone, Prome Minister a contesta cu semper e opinion di sr. Ben Marapin ta bon bini, y cu gobierno semper ta tene cuenta cu consehonan pidi y no pidi.

Tocante e tema di e refineria gobierno no ta di acuerdo cu sr. Marapin, locual por pasa pero e ta compronde pakico e ta bisa esaki.

E mandatario personalmente ta haya ideal si Aruba su economia no depende di un multinacional, manera e refineria, pasobra si wak bon ora e refineria ta bay bon, cosnan ta bay bon na Aruba, pero ora su margen di ganashi no ta halto suficiente, e ta afecta henter nos pueblo. E dignatario a expresa cu e no kier pa pueblo di Aruba su stabilidad y felicidad depende di kico un multinacional na Merca ta haci

Su deseo ta pa Aruba nunca depende di un solo compania of un solo persona cu por influencia henter un desaroyo economico.

Pero na e momento aki e situacion ta un poco diferente, y no a yega na e realidad aki ainda. E mandatario a subraya cu den e cuadro aki gobierno ta trahando den tres fase: fase 1 ta, CITGO si of no. E ta yegando na no, y ta kedando cla cu esey; fase 2 ta busca un otro operador, no obstante e ta tene cuenta cu ta realisticamente posible cu gobierno no haya otro operador.

Sinembargo, e ta corda cu el a sinta hunto cu su colega minister Lampe cu operadornan cu kier haci di e refineria industrianan hopi innovativo y limpi pa nos medio ambiente, y aworaki gobierno no por bisa cu no ta bay scucha nan, pero mester scucha nan.

Pero si enberdad nada di esaki ta posible, anto nan lo bay den plan C cu ta algo completamente diferente pa e refineria.

Tambe ta asina cu diferente biaha, y den e entrevista cu DIARIO tambe, sr. Marapin ta enfatiza cu gobierno tin cu baha gasto. E ta haya cu esaki ainda no ta suficiente.

Minister Presidente a indica cu e tin razon, cu gobierno mester baha su gastonan pasobra si no hacie, hamas nos pais ta bay para riba su propio pia. Y esey gobierno ta haciendo. Tin diferencia di opinion si esaki ta bayendo suficiente of no pero locual gobierno ta haciendo te aworaki ta haci dolor.

Aña pasa gobierno a baha gastonan di personal cu seis miyon florin, pero por mira cu tabata tin accion di Aduana, e sindicatonan kier indexering, y gobierno no ta den posicion aworaki di bisa pa baha gasto  cu 60 miyon florin, pasobra e lo crea un situacion hopi serio den nos comunidad. Locual gobierno ta haci ta baha tur gasto cu proporcion.

- Advertisement -

DUNA COMENTARIO

Please enter your comment!
Please enter your name here