Home Gobierno “Gobierno ta enfoca pa crea cupo di trabao, pa aumenta rentabilidad y...

“Gobierno ta enfoca pa crea cupo di trabao, pa aumenta rentabilidad y pa mehora e finanzas publico”

17
0
SHARE
- Advertisement -

Gobernador:

ORANJESTAD(AAN): Un otro pilar cu ta sostene un democracia sano ta creacion di un sistema di servicio y ehecucion di inversion publico di e aparato gubernamental y semi-gubernamental, pa e ta uno husto y transparente.

Esaki Gobernador Alfonso Boekhoudt a bisa den su discurso Diamars, pa apertura di Aña Parlamentario nobo.

Gobernador a bisa tambe cu Gobierno tin e tarea grandi y urgente pa – den tur transparencia – cambia of mehora e sistema existente y pa sigura cu decisionnan cu ta necesario pa prosperidad y bienestar di nos pais no wordo posponi mas.

“Cu e Oficina di Integridad di Aruba Gobierno ta spera di por crea mas conciencia riba e tereno di integridad. Den e aña parlamentario nos dilanti lo bai traha pa institui un Camara di Integridad (Integriteitskamer) cu lo mester wordo encarga pa revisa asuntonan cu ta regarda bon gobernacion. Hunto cu Banco Central ta trahando riba un codigo di maneho empresarial pa introduci guianan general riba e tereno aki”.

Esaki segun e Gobernador, kende a bisa tambe cu pa loke ta nos maneho economico, por remarca cu e maneho di Gobierno ta enfoca pa crea cupo di trabao, pa aumenta rentabilidad y pa mehora e finanzas publico, mientras ta tene cuenta cu nos recursonan limita. A identifica 6 sector cu lo enfoca riba nan: (*) Turismo, (*) Economia di conocemento, (*) Logistica, (*) Sector primario, (*) Economia circular, (*) Industria creativo y cultural manera arte y musica, diseño grafico.

“Un economia fuerte ta resistente pa contratempo of crisis y tin capacidad pa recupera lihe. Hustamente esaki ta causa cu Gobierno lo dedica atencion na dje den e Maneho Economico Integral cu a desaroya pa e periodo 2019-2021. E maneho aki ta fiha riba e meta pa contribui na un calidad mas halto di bida pa tur ciudadano, pa crea trabou inclusivo, pa facilita oportunidadnan pa negoshi nobo y innovativo y pa stimula inversion local y inversion for di exterior”.

“Pero un economia resistente y flexibel no ta un solucion riba su mes. Pa logra esaki, nos mester tene cuenta cu Aruba no ta inmuno pa shocknan externo, cambio climatico y e echo cu nos ta limita den recursonan natural”.

Esaki segun Gobernador Boekhoudt, kende den su discurso a sigui bisa tambe cu pa medio di un proceso participativo, Gobierno lo incorpora liñanan di maneho specifico pa tur sector economico tene cuenta cu esaki.

E maneho nobo, di cual cierto elementonan ya caba ta den implementacion, lo bay man den man cu un plan di concientizacion nacional.

 

- Advertisement -

DUNA COMENTARIO

Please enter your comment!
Please enter your name here