ORANJESTAD (AAN): Riba Diaranzon mainta, gremionan comercial di Aruba cu a wordo invita pa un encuentro cu Ministerio di Finanzas di Aruba, a bin confirma loke nan tur ta teme di bastante tempo caba.
Esey ta cu Gobierno di Aruba di berdad kier introduci Sugar Tax riba e isla. Gobierno ta manera ta out-of-touch cu pueblo, y no sa caba con hopi poblacion ta sufriendo cu prijsnan astronomico riba e isla. Prijsnan cu ta sky-high caba debi na BBO, y tambe debi cu tur container cu drenta den waf di Aruba tin di paga un ‘fee’ astronomico cu no ta cuadra cu e resto di region.
Pesey mes, pieza di auto na Aruba ta casi triple biaha mas caro compara cu prijs di pieza di auto na Bonaire como tambe St. Maarten.
Envez cu Gobierno busca forma pa hisa su entrada sin mishi cu e cartera di homber chikito, awor ta finalizando plannan pa bin cu un Sugar Tax entrante 1 Januari 2020 venidero.
Envez cu Gobierno busca forma pa elimina e ‘fee’ astronomico aki di ASTEC na Waf cu ta horcando tur habitante y turista, nan ta bay hisa prijs riba tur producto di bebida cu sucu aden, y esey lo nifica cu e prijs di e Cocktail cu dos aña pasa tabata $6 y a subi aña pasa na $8, awor sigur lo bay yega $10 of mas.
Sugar Tax lo bay ta devastador pa turismo, y pa cartera di pueblo.
Y pesey mes gremionan comercial a keda nada contento ora cu Ministro Xiomara Ruiz-Maduro y su coordinador Nilo Swaen a trece e proposicion/pregunta dilanti na e gremionan, ta cual di e tres plannan di Sugar Tax lo ta mihor pa Aruba.
Loke hopi experto a puntra mesora ta: Faltando menos di 118 dia pa e fecha di 1 Januari 2020 yega, awor numa Gobierno kier cuminza rush e Sugar Tax aki riba pueblo di Aruba? Ta kico Ministerio di Finanzas a haci tur e lunanan cu a pasa?
President di KvK mes riba Diaranzon a declara na prensa local, cu nan no ta contento con Ministerio di Finanzas a organiza e sesion aki, unda a laga varios gremio importante afo, a cambia agenda na ultimo minuut, a yega laat, y tabata papia detayenan hopi bruha durante e presentacion.
Ta kico Gobierno ta haciendo? No a ni consulta cu pueblo riba e cambionan fiscal cu lo bin entrante 2020.
Y ta parce cu un biaha mas, Gobierno ta prefera di habri orea pa loke Organizacionnan Internacional ta conseha, y ta pusha un banda loke expertonan local mes ta duna como sugerencia.
Esaki ta algo cu ta decepcionando hopi hende. Pa KvK tambe tabata inaceptable cu Gobierno a organiza e sesion, pero duna gremionan solamente 10 minuut di tempo pa haci pregunta/remarke riba e asunto importante aki pa futuro 20 aña di Aruba.
Gobierno di Aruba ta haciendo cosnan cu no ta cumpli cu nada di transparencia, si actua asina contra Sindicato y tambe contra Gremionan.
Hecho ta cu Gobierno porfin a cuminza confirma cu Sugar Tax na caminda. Ainda tin di spera ki informacion nobo lo wordo duna Diahuebs den otro reunion, relaciona cu cambionan di e ley di BBO, y tambe implementacion di ley nobo special pa mundo di Horeca.
DIARIO a ripara cu den pueblo, tin hopi hende furioso cu e idea pa bin cu Sugar Tax. Y tin di tene na cuenta cu na otro paisnan, e Tax aki a “back-fire” bastante riba Gobiernonan cu a bin cune. E Tax aki a nifica tambe cu Gobiernonan cu a introduci e ley, e siguiente eleccion a perde masha mahos mes.
