Home General Holo y gas ta afecta habitantenan di Parkietenbos y becindario

Holo y gas ta afecta habitantenan di Parkietenbos y becindario

195
0
SHARE
- Advertisement -

Stichting Parkietenbos kier claridad for di Gobierno

ORANJESTAD (AAN):  Aldrich Croes ta vocero di Stichting Parkietenbos y den entrevista cu DIARIO el a indica cu ya pa tres luna mas o menos, habitantenan di e bario Mahuma, Buenavista, Parkietenbos, Simeon Antonio y un parti di Wayaca tambe ta experenciando un holo di gas cu ta sali for di sea dump of otro sitionan.

A indica cu tin desperdicio ta wordo dera caminda e holo aki ta afecta e barionan menciona. E barionan ta grandi y a haya varios yamada y tambe mensahenan como email di e habitantenan.

Pa e motibo ey e fundacion a dicidi di reuni pa haci un inventario of haya sa kico ta pasando den e proceso di yega na un solucion pa loke ta maneho di desperdicio pa Aruba, a señala, specificamente ariba e sitionan cu e sushi ta wordo dera.

Nan prome reunion tabata cu director di Serlimar, Henley Davelaar y su team. Nan a informa di nan operacion y e fundacion a informa Serlimar di nan preocupacion.

Segun Croes, nan a haya algun splicacion di e proceso cu ta tumando lugar. A dicidi di bay na e sitio tambe y na Seroe Tijshi y a constata algun cos cu ta preocupa nan.

Un preocupacion ta pasobra e holo ta hopi fuerte eynan y ta casi similar na loke e barionan ta hayando.

A haci un bishita tambe na Ecogas y a mustra kico ta e situacion cu nan tambe tin restonan di loke ta wordo produci na e paletnan cu ta wordo dera na Seroe Tijshi y kico ta e situacion di e seronan aki cu tambe ta emiti cierto holo y gas.

Tur esaki ta locual e habitantenan ta sintiendo, principalmente ora biento cambia di direccion, Aldrich Croes a splica.

El a sigui bisa cu nan no a toca e tema di e incinerator pa motibo cu e proceso pa yega na un solucion ta locual ta e crisis pa e barionan awor. Pesey nan a bay Serlimar prome pa haya sa kico nan ta haciendo.

Na e sitio a constata e deramento cu ta tumando lugar, pero tambe a wak un situacion caminda ta spera cu ora di kima nan e gas no bin den e barionan, a indica.

Na Ecogas, a agrega, nan sa cu nan ta paketa e sushi produci di RdA etc, pero mas leu di kico ta haci cu e restonan, a haci pregunta y kico ta haci cu e restonan e fundacion no a haya e contesta mucho cla di kico ta haci cu e resto cu ta keda ora nan caba di procesa.

Croes a menciona cu esaki ta dos entidad cu ta haciendo e trabao y e efecto di nan trabao ta afectando di un manera of otro e barionan ora biento bolter.

E linea di e fundacion como NGO te cu aworaki ta yega te na bisa cual ta e preocupacionnan. “Manera PAHO a bisa, e dump tin cu cera. E dump no por keda habri mas. E ta un menaza pa salud publico”.

Otro aspecto di preocupacion ta cu si no ta creando mas dump, e ora ta bira un cuestion cu gobierno y entidadnan tin cu sinta hunto y mira con ta bay solucion’e. Si ta incinerator of algo otro.

E fundacion no kier drenta den e polemica ey, pero ta un cuestion di gobierno y otro entidadnan cu ta trahando ariba e materia. Pero nan ta urgi pa e cabeznan sinta hunto y yega na un proceso cu ta un solucion ya cu no por extende e problema aki mas, Aldrich Croes a remarca.

E problema aki ta uno cu ta menaza e salud di e bario y ta un menaza pa Aruba.

E fundacion a pidi un reunion cu gobierno mes y a wordo concedi un reunion cu Minister Otmar Oduber unda nan lo expone e situacion cu tin, a bisa.

Mientras cu e solucion ta na caminda ta ripara cu e holo y e gas ta mas fuerte ora biento ta bolter. No sa cuanto mas esaki ta dura y si por reduci e factornan ey pa asina e salud di comunidad no wordo afecta mas, Croes a enfatiza.

Finalmente, e fundacion ta spera cu nan por haya e suficiente claridad door di gobierno y si algo ta bay wordo haci pa mitiga e holo y e gas sigui afecta e habitantenan di e barionan afecta.

- Advertisement -

DUNA COMENTARIO

Please enter your comment!
Please enter your name here